Zyra e statistikave të BE-së ka vlerësuar me rritje prodhimin e brendshëm bruto për vendet që përdorin monedhën euro, si dhe për të 28 vendet anëtare (EU28). Rritja krahasuar me tremujorin e dytë të një viti më parë ka qenë përkatësisht 2.2% për vendet që janë përdoruese të euros dhe 2.3% për vendet e BE-së. Ndërsa krahasuar me tremujorin e parë të 2017-s në të dyja zonat përllogaritet 0.6%, raporton Eurostat.
Ritmet e rritjes janë përshpejtuar në raprt me tremujorët e mëparshëm, duke sinjalizuar për një rimëkëmbje të qëndrueshme të ekonomisë së eurozonës.
Në tremujorin e parë të 2017-s PBB-ja u rrit me 0.5% në të dyja zonat. Krahasuar me të njëjtin tremujor një vit më parë, u rrit me 2.2% në 19 shtetet që përdorin euron dhe 2.3% për 28 vendet e BE-së.
Në rritje ka qenë edhe ekonomia italiane. Prodhimi i Brendshëm Bruto për Italinë vlerësohet më rritje sipas Eurostat, ku rritja krahasuar me një tremujor më parë është 0.4%, ndërsa rritja e krahasuar me të njëjtën periudhë një vit më parë është 1.5%, nga 1.2% që ishte rritja vjetore në tremujorin e parë. Zgjerimi ekonomik i Italisë sipas mediave italiane, ishte përtej pritshmërive dhe është niveli më i lartë i regjistruar në 6 vjet dhe ka ardhur nga përmirësimi i aktiviteteve të industrisë dhe shërbimeve shkruan Monitor.
Ecuria e ekonomisë italiane është e rëndësishme edhe për Shqipërinë, pasi sinjalizon se porositë e partnerëve italianë do të jenë të qëndrueshme. Italia është partneri kryesor i Shqipërisë përsa i përket eksporteve. Vetëm në 6 mujorin e parë të viti eksportet me Italinë zinin 54% të volumit dhe importet 30%./a.m.
