Lokacioni i saktë i zyrës së re të Zhanna Nemtsovas është një sekret i ruajtur mirë, kjo për shkak se ajo ka marrë kërcënime të shumta me vdekje në Moskë. Edhe në Bon të Gjermanisë, ku aktualisht jeton, zyrtarët janë të shqetësuar për sigurinë e të bijës 31-vjeçare të politikanit të vrarë rus, Boris Nemtsov.
Duke mos qenë më e sigurt në kryeqytetin rus, ajo iku në Gjermani nëntë muaj më parë. Dhe tani e ka humbur krejtësisht besimin edhe te hetuesia ruse.
“Mendoj se mund të ushtroj presion më të madh prej këtu për të siguruar që vrasja e babait tim të hetohet në mënyrë të plotë”, thotë Nemtsova, libri i së cilës “Dridhja e Rusisë” porsa është botuar në Gjermani, shkruan “Spiegel”, transmeton “Koha Ditore”.
Shkrimtarja punon aktualisht edhe si gazetare për transmetuesin ndërkombëtar gjerman “Deutsche Welle”. Ndërkohë ajo po insiston që Këshilli i Evropës të caktojë një raportues special për të hetuar vdekjen e babait të saj.
Vetëm diç më shumë se para një viti më 27 shkurt 2015, persona të armatosur e qëlluan për vdekje babanë e saj në afërsi të Kremlinit, duke e qëlluar politikanin në qafë, mushkëri, zemër dhe mëlçi.
Sulmi shërbeu si dëshmi se Rusia nuk është më një vend i sigurt për ata që e marrin guximin ta kritikojnë qeverinë dhe si tregues se në këtë vend tani madje as ish-prefektët dhe as zëvendëskryeministrat nuk janë më imunë ndaj kërcënimeve…
