Kancelari gjerman Olaf Scholz tha se sanksionet perëndimore ndaj Rusisë po tregojnë “efekte, të cilat do të bëhen më dramatike çdo ditë”.
Ai theksoi se ndërprerja e furnizimit me energji nga Rusia duhet të jetë “e menaxhueshme” për vendet evropiane.
“Lufta e Ukrainës mund të jetë një mosmarrëveshje më e gjatë dhe për këtë arsye ne duhet të përballemi së bashku”, tha Scholz, duke folur në një konferencë shtypi së bashku me Presidenten e Parlamentit Evropian Roberta Metsola.
Scholz tha se qëndrimi i Gjermanisë për ndalimin e gjerë të Bashkimit Evropian për importet ruse të energjisë nuk ka ndryshuar.
“Kjo vlen edhe për shumë vende të tjera evropiane që janë edhe më të varura nga qymyri, nafta dhe gazi rus, madje më shumë se Gjermania. Ne vendosëm të na bëjmë të pavarur sa më shpejt që të jetë e mundur nga importet e gazit dhe naftës nga Rusia”, tha udhëheqësi gjerman, duke shtuar se disa “punë ndërtimi dhe kontrata shumë intensive” janë të nevojshme për ta bërë Gjermaninë më pak të varur nga energjia ruse.
Nga ana tjetër Metsola tha se Evropa duhet të bëhet plotësisht e pavarur nga energjia ruse.
“Ne duhet të blejmë energjinë tonë nga miqtë, jo nga armiqtë, sepse në fund ne po paguajmë për këtë luftë çdo ditë. Është koha për të marrë drejtimin. Ne nuk po flasim vetëm për axhendën e gjelbër, duke e konsideruar atë nga këndvështrimi mjedisor, një këndvështrim klimatik, por po e shohim edhe nga një këndvështrim sigurie”, tha Metsola.
/b.h
