Katër personat e arrestuar në Shkodër, si të lidhur me organizatën terroriste ISIS dhe militantë të saj me origjinë shqiptare dhe Kosovare, dyshohet se po planifikonin një sulm me armë kundër kombëtares izraelite. Skuadra e futbollit të Izraelit, pritet që në datën 12 nëntor të zhvillojë në stadiumin e Shkodrës në “Loro Boriçi” ndeshjen e futbollit me Shqipërinë. Mirëpo për garantimin e sigurisë së kësaj ndeshje futbolli, janë angazhuar dhe shërbime inteligjente të huaja dhe vendase.
Biseda për Izraelin
Një burim i tha gazetës Shqiptarja.com se katër personat e arrestuar si Medat Hasani, Xhezair Fishti imam i vetëshpallur, Bekim Protopapa i cili punonte si mjek në zonën e Malësisë së Madhe dhe Ergys Faslija, i cili ka studiuar për Bio-Kimi dhe infermieri në Shkodër, por që aktualisht punonte si berber në këtë qytet, gjatë takimeve të tyre kanë biseduar lidhur me mbëritjen në Shqipëri të kombëtares Izraelite. Ka dyshime të forta, se të arrestuarit mund të kenë dashur të venë në zbatim planin për të kryer një sulm terrorist ndaj kombëtares së Izraelit. Megjitha kjo nuk është konfirmuar zyrtarisht, por burime pranë prokurorisë dhe policisë thanë se për arrestimin e katër personave të sipërcituar kanë bashkëpunuar me një angjensi inteligjente të huaj. Nisur nga kjo situatë ndaj katër të arrestuarve është ngritur akuza e “Veprave me qëllime terroriste”, “Nxitja e urrejtjes ose e grindjeve”, “Organizimi për pjesëmarrje në luftime luftarake në një shtet të huaj”.
Drejtues Xhezair Fishti
Sipas burimeve të prokurorisë, personi që mbante fjalimet në takimet në xhamitë, ka qënë shtetasi Xhezair Fishti,i cili ishte dhe njeriu që mbante ligjëratat dhe mësohet të jepte orientimet ndaj tyre. Akuza, thotë se ky person ishte krysori, për përhapjen e propogandës së ISIS, duke u dyshuar se i ka ftuar dëgjuesit ti bashkoheshin xhihadit dhe luftimeve në Siri dhe Irak. Operacioni është në vijim dhe hetimet po ndiqen në dinamikë në bashkëpunim me Prokurorinë për Krimet e Rënda. Falë këtij operacioni janë shoqëruar 16 shtetas të tjerë, nga këta 5 të huaj, Kosovarë dhe Maqedonas dhe 11 shqiptarë.Operacioni është drejtuar nga Drejtoria Antiterror në Policinë e Shtetit bashkërendim me Drejtoritë Vendore të Policisë Tiranë, Shkodër, Dibër, Elbasan si dhe me Forcat e Lëvizshme Operacionale dhe është zhvilluar në qytetet Tiranë, Dibër, Shkodër dhe Elbasan.Ndërkohë që ka qënë prokurori Eugen Beci, ai që ka firmosur urdhër-arrestet për personat e dyshuar.Gjatë marrjes në pyetje, asnjëri prej tyre ska pranuar akuzën e ngritur nga prokuroria, duke pohuar se po sakrifikohen vetëm për shkak se ata besojnë në fenë islame.
Shqiptarja/d.i.
