Të dhënat e Agjencisë së Statistikave të Kosovës, flasin se Kosova ka një rritje të pamjaftueshme ekonomike në krahasim me të ardhurat kombëtare për frymë banori si dhe në krahasim më standardin jetësor të qytetarëve, vlerësojnë ekspertë të çështjeve ekonomike. Sipas të dhënave të Agjencisë së Statistikave të Kosovës të publikuara pak më parë, Bruto Produkti Vendor për frymë banori në Kosovë për vitin 2014 është 3084 euro, apo në muaj 257 euro. Ndërsa rritja ekonomike në vitin 2014 thuhet të ketë qenë 1.2 për qind.
Të ardhurat për frymë banori, sipas përfaqësuesve të organizatave joqeveritare, llogaritet të jetë shumë më e ulët se 257 euro në muaj për disa familje në Kosovë.
Kryetari Organizatës joqeveritare “Konsumatori”, Selatin Kaçaniku, në një prononcim për Radion Evropa e Lirë, thotë se me të ardhurat mujore që kanë familjet në Kosovë, nuk arrijnë t’i përmbushin as nevojat elementare për jetë.
Shkalla e papunësisë në Kosovë, sipas të dhënave zyrtare të Agjencisë së Statistikave të Kosovës, kishte shënuar rënie të lehtë nga 30.9 për qind në 30.0 për qind midis viteve 2012 dhe 2013, mirëpo ka shënuar rritje në 35.3 për qind në vitin 2014.
