Një ndeshje plot emocione ka qenë ajo mes Shqipërisë dhe Maqedonisë. Mbrëmja e së hënës nisi si në festë e vërtetë për Kombëtaren tonë, e cila shënoi me Sadikun që në minutën e nëntë. Megjithatë, ishte shiu ai që ndërpreu ndeshjen, për t’u riluajtur me minutat e mbetura ditën e djeshme.
Një fitore e merituar ishte ajo e Shqipërisë, e cila mundi në Shkodër Maqedoninë me rezultatin 2-1. Emocionet dhe festën e vërtetë të djemve kuq e zi, kush më mirë sesa një futbollist mund ta rrëfejë. Taulant Xhaka ka rrëfyer për “Summer Pages” atmosferën në dhomat e Kombëtares, duke zbuluar festën e djemve kuq e zi. Mesfushori ynë tregon se djemtë kanë festuar për fitoren në dhomat e zhveshjes, sepse fill pas ndeshjes, atyre do t’u duhet të shpërndahen në skuadrat ku lozin.
“Ka qenë një atmosferë shumë e ngrohtë në dhomat e zhveshjes. Të gjithë kemi festuar për fitoren. Mendoj se ishte një fitore e merituar kundra Maqedonisë. Ne bëmë një lojë të mirë dhe e merituam rezultatin. Festa nuk vijoi më tej, sepse na u desh të kthehemi tek ekipet tona ku lozin në diasporë. Megjithatë, jemi gëzuar shumë për këtë fitore. Kanë qenë momente të paharrueshme për ne”. Megjithatë, si një profesionist i vërtetë, Xhaka mendon se Shqipëria mund të bënte edhe një lojë më të mirë. “Duhet t’i përmirësojmë disa gjëra, sepse kishim mundësi ta mbyllnim lojën që mbrëmjen e ditës së hënë”, shprehet Xhaka.
Në prononcimin e tij nuk harron pa prekur edhe largimin e futbollistëve te Kombëtarja e Kosovës. Sipas tij, këto largime nuk e dëmtojnë skuadrën tonë, pasi si një ekip i maturuar, ka fituar tanimë besimin. Nuk harron pa vlerësuar edhe talentet që tashmë janë pjesë e Kosovës. “Largimet e futbollistëve nuk e dëmtojnë Kombëtaren tonë. Ne kemi shumë kualitet në ekipin tonë dhe shumë vetëbesim. Normal që Rashica është një talent shumë i mirë. Në fund të fundit të gjithë e kanë për vete dhe unë nuk dua të përzihem”, përfundon Taulant Xhaka reagimin e tij për “Summer Pages”.
BW/d.i.
