Drejtoria e Përgjithshme e Tatimeve njoftoi elektronikisht në sistemin E-Filing 365 tatimpaguesit, të cilët përfitojnë nga raundi i fundit i zbatimit të Ligjit të Faljes.
Administrata Tatimore rikujton se data 31 dhjetor 2017 është afati i fundit i kryerjes së pagesave të detyrimit principal të papaguar në mënyrë që këta tatimpagues të përfitojnë jo vetëm fshirjen e gjobave dhe interesave të regjistruara deri në datën e hyrjes së ligjit në fuqi, por njëkohësisht dhe heqjen e çdo mase administrative të ndërmarrë kundrejt tyre për mbledhjen e detyrimit me forcë.
Administrata Tatimore i bën thirrje të gjithë tatimpaguesve, të cilët kanë detyrime principali të papaguara për periudhën 2011-2014, të kryejnë sa më parë pagesën e këtij principali për të përfituar fshirjen/shuarjen e të gjithë detyrimeve të tjera për gjoba dhe interesa të papaguara. Tatimpaguesit mund të konsultohen me legjislacionin tatimor lidhur me detyrimet që përjashtohen nga falja në udhëzimin e ministrisë së Financave.
Pak ditë më parë tatimet njoftuan se nga 2400 subjekte kanë paguar detyrimet e prapambetura në vlerën 1 miliard e 775 milionë lekë. Më shumë se 28 mijë tatimpaguesve iu janë fshirë automatikisht detyrimet për periudhën para vitit 2010 dhe për periudhën 2011-2014 janë fshirë detyrimet pas pagesës së principalit. Shuma e detyrimet të falura llogaritet 16 miliard lek, ndërsa përdorimi i kredisë për shlyerjen e detyrimeve në nivel principali është në vlerën 1.667 miliard lekë./b.d
