Vetëm në dy ditët e fundit task force për ujin e pijshëm pas verifikimeve ka ndërprerë 189 lidhje të paligjshme të ujit të pijshëm, kryesisht në periferi të Tiranës.
Grupet e punës në terren të shoqëruar nga Policia e shtetit dhe ajo bashkiake kanë bërë verifikimin e 790 rasteve, dhe kanë evidentuar lidhje të paligjshme apo përdorim të ujit të pijshëm për ujitje tokash dhe të mbjellash bujqësore.
Që nga dita e parë, nga 14535 raste të verifikuara nga grupet e punës, numri i lidhjeve të paligjshme të prera nga specialistët është 2601 raste, ndërsa janë gjobitur dhe 299 abonentë.
Paralelisht me prerjen e lidhjeve të paligjshme, si dhe për disiplinimin e çdo rasti tjetër të abuzimit me ujin e pijshëm, është punuar edhe për lidhjen e kontratave të rregullta me UKT. Në dy ditët e fundit janë nënshkruar 216 kontrata të reja. Në total, numri i kontratave të reja ka arritur në 1557, si dhe është bërë e mundur nënshkrimi i 485 aktmarrëveshjeve për pagesat e ujit të pijshëm.
Specialistët e Ujësjellës Kanalizimeve Tiranë kanë punuar dhe në drejtim të vendosjes së matësve të rinj të ujit, ku gjatë dy ditëve në kryeqytet janë instaluar 286 të tillë, duke e çuar numrin e përgjithshëm në 2548 matës uji.
a.ç
