Një adoleshent, i cili ishte mes 4 viktimave nga të shtënat në një festë ditëlindje në Alabama të SHBA-së vdiq duke shpëtuar jetën e motrës së tij. Phill Dowdell, 18 vjeç, shtyu motrën Alexis Dowdell, e cila ishte vajza që kishte ditëlindjen në tokë kur plasën të shtënat.
“Gjëja e fundit që i thashë ishte të qëndronte i fortë”, tha Alexis për BBC. 32 persona mbetën plagosur si pasojë e sulmit. Alexis tha se Phil kishte shkuar ta merrte pasi kishte dëgjuar se dikush kishte një armë. Kur shpërthyen të shtënat ai e shtyu në tokë para se të dy të ndaheshin në turmë.
Më vonë, ajo e gjeti sërish vëllain i cili ishte pranë vdekjes, i pamundur për të folur. Alexis ka treguar se e mbajti në krahë dhe se i vëllai hapi sytë e më pas ndërroi jetë.
Alexis dhe mamaja e tyre, LaTonya Allen, thanë se nuk e dinë se çfarë i shkaktoi të shtënat. Allen tregoi se djali e ka bërë krenar në çdo mënyrë.
“Një pjesë e zemrës është thyer. Ai duhej të diplomohej muajin e ardhshëm. Në vend ceremonisë së diplomimit më duhet të shkoj në varreza të shoh djalin tim”, tha ajo.
Në lidhje me ngjarjen, policia nuk ka shpallur ende asnjë të dyshuar apo një motiv për atë që ndodhi në Dadeville, një fshat i vogël me rreth 3 mijë banorë. Autori është ende në arrati.
Nga kjo ngjarje shumë e rëndë humbën jetën edhe Shaunkivia Smith, 17 vjeçe, Marsiah Collins, 19 vjeç, dhe Corbin Holston 23 vjeç.
Të afërmit e Smith kanë treguar se ajo do të diplomohej shumë shpejt. Ndërsa Collins luante futboll, por shpresonte të bëhej avokat. Holston kishte shkuar në festë për të parë një anëtar të familjes pasi kishte dëgjuar se po krijonte probleme.
Dëshmitarë kanë thënë se para të shtënave dëgjuan thashetheme se dikush kishte marrë një armë në festë. LaTonya Allen ka ndezur dritat dhe ka folur në mikrofon duke kërkuar të largohet kushdo që ka armë me vete. Askush nuk u përgjigj dhe ajo rifiku dritat. Pas kësaj ndodhi gjithçka.
/a.r
