Ish-kryekomunari i Bërzhitës Genci Drita kërkon lirinë nga burgu për shkaqe shëndetësore.
Por Gjykata nuk është bindur ndaj ka caktuar tre ekspertë për të kontrolluar në qeli nëse Drita ka probleme me shëndetin.
Burime për ReportTv tha se ish-kryekomunari ka paraqitur një raport mjekësor ku pretendon se është me sëmundje të rëndë në rrugët respiratore dhe aparatin e frymëmarrjes.
Por përpara dhënies së një vendimi nëse do të lirohet apo jo për të vuajtur pjesën e mbetur të dënimit në shtëpi, gjykata është në përsëritje të ekspertizës.
Admir Sinamati, Zija Ismaili dhe Fatos Sinani janë tre ekspertët e mjekësisë ligjore të cilët më 6 qershor do të depozitojnë raportin nëse vërtet Drita vuan apo jo nga një sëmundje e rëndë.
Drita është dënuar për korrupsion, pasi së bashku me ish-përgjegjësin e Taksave në Komunë, Armand Burri, i kanë marrë 4 mijë e 500 euro një shtetasi në këmbim të dhënies së lejes së përdorimit të një hapësire publike në territorin e kësaj njësie vendore./a.m.
