Ekspertët e ekonomisë thonë se ka pak mundësi që të aplikohet tarifa ndaj vet Kosovës për shkak të dinamikës së ulët të shkëmbimit tregtar, shkruan A2 CNN.
“Nuk kemi dinamikë të madhe të eksporteve me SHBA, është një masë e eksporteve që e kemi dhe gjasat janë që Amerika e sheh Kosovën si pjesë të sferës së saj të influencës dhe aleate zyrtare e saj gjasat janë që tarifat nuk do imponohen në Kosovë”, shprehet Emanuel Bajra, ekspert i ekonomisë.
Ndikimi mund të jetë të diaspora e Kosovës e cila me remitencat e saj ka një ndikim të konsiderueshëm në ekonominë kosovare.
“Efektet potenciale në ekonomi, në rajon në përgjithësi do të vijnë nga efektet që do t’i ketë nëse Trump vendos që t’i vë tarifa Gjermanisë, Francës, Italisë e vendeve të tjera përreth, atëherë efektet do të jenë edhe në Kosovë. Sepse mos të harrojmë që kemi 1.4 miliardë euro remitanca që vijnë nga diaspora dhe kjo do t’i afektojë ata”, thotë eksperti.
Ekonomia mund të shfrytëzohet nga administrata Trump për të shtyrë Kosovën dhe Serbinë drejt një marrëveshjeje ndërkombëtare.
“Ata zakonisht e kanë një qasje ekonomike për zgjedhjen e problemeve, kështu kanë mundësi të na shtynë neve të arrijmë marrëveshjeje tjera për zhvillimin e infrastrukturës me vendet përreth e sidomos me Serbinë që nëse ndodh kjo, ne do të përfitonim”, shprehet për A2 CNN Ilir Hajdini, ekspert i ekonomisë.
Në mandatin e parë të Trump në Shtëpinë e Bardhë ishte firmosur ajo që njihet si Marrëveshja e Uashingtonit, në të cilën u siguruan disa projekte infrasturkturore, ndërsa Kosova fitoi edhe njohjen nga Izraeli.
