Igli Tare, drejtori sportiv i Lazio-s, është një ndër më figurat më të nderuara shqiptare në Itali. Ish-futbollisti i Kombëtares po tregon dita ditës se është jo thjesht jetik për skuadrën laciale, por edhe i suksesshëm.
Jo pak herë Tare është paragjykuar për afrimin e shqiptarëve në skuadër, siç edhe vetë ai tregon, por me kalimin e kohës këto paragjykime kanë marrë përgjigjen e duhur dhe e kanë nderuar drejtorin sportiv.
“Shumë herë jam paragjykuar edhe për faktin se kam sjellë shqiptarë në ekip. I pari që kam sjellë, ka qenë Strakosha në ekipet e moshave, pastaj Cana, Berisha dhe disa djem që janë me ekipet e moshave. U kam dhënë mundësinë thjesht sepse nuk kam bërë kurrë diferencën ndërmjet shqiptarit apo një braziliani për shembull. Kam pasur gjithmonë dëshirë për t’i dhënë mundësi një futbollisti me origjinë shqiptare, sepse e kam ditur gjithmonë se sa e vështirë është për t’u afirmuar në futbollin e niveleve të larta dhe në klube të mëdha, kështu që ato pak zgjedhje që unë kam bërë, besoj që më kanë dhënë konfirmimin, pasi jo vetëm që kanë nderuar fanellën e Lazios, por kanë transmetuar imazhin më të bukur të karakterit të shqiptarëve”, deklaroi Tare për ‘super sport’.
Si një prej figurave kryesore në sportin shqiptar, dhe biri i një familje sportistësh, Tare nuk e fsheh të dëshirën që në të ardhmen të kontribuojë dhe për vendin e tij.
“Një nga ëndrrat e mia është që një ditë të kthehem në Shqipëri dhe të kontribuoj për futbollin e vendit tim. Por e thëna me të bërën janë dy gjëra shumë larg njëra-tjetrës. Për t’u kthyer duhet të jenë edhe shumë kushte të përshtatshme, pasi Shqipëria është ende larg nga ku mund të jetë. Nëse do të kthehesha një ditë, do të vë në rrezik gjithçka që kam realizuar këtu, por do të më pëlqente shumë ta realizoja si sfidë”, u shpreh ai./a.m.
