Në një reagim publik drejtuar kryeministrit, studiuesi i njohur i historisë dhe trashëgimisë kulturore kërkon ndërhyrje urgjente për të ndaluar atë që e quan “masakër mbi pasurinë kombëtare”. Ai paralajmëron se ndërhyrjet e pakontrolluara po dëmtojnë rëndë Via Egnatian – një nga rrugët më të rëndësishme të civilizimit europian – duke na bërë “qesharakë në sytë e botës” dhe duke rrezikuar trashëgiminë shekullore të Shqipërisë.
Postimi i plotë:
“Z. Kryeminister,
Vini dorë ju lutem vini dorë për të ndërhyrë dhe për të ndaluar këtë masakër në dëm të Trashëgimisë Kulturore në Shqipëri.
Përpos fakti që po bëhemin qesharakë në sytë të botës, po shkatërrojmë edhe atë pasuri që kemi trashëguar ndër shekuj.
Trashëgimia jonë Kombëtare nuk mund të trajtohet në këtë mënyrë megjithë dëshirën e mirë që mund të jetë arsyeja e këtyre nderhyrjeve kaq qesharake dhe absurde.
Rrënimi i institucioneve kombëtare të Trashëgimisë dhe futja e OJF, firmave dhe Institucioneve që nuk kanë kapacitete po sjell dëme të pa kthyeshme në Trashëgimi.
Via Egnatia një ndër 10 rrugët më të rëndësishme te civilizimit europian. Rruga ku shkelen legjionet romake gjatë Luftës Civile te Cezarit dhe Pompeut. Rruga ku shkelen Perandorët e cdo epoke Imperiale nga Roma drejt Konstandinopojes. Nga ku etërit e Kishës sollën mesazhet biblike prej Jeruzalemit. Nga ku kultura e Orientit mbriti në Europë. Rruga nga ku barbarët rrënuan civilizime por pa e shkatërruar atë. Rruga e Kryqëzatave që vërshuan drejt Lindjes. Udha prej ku Sulltanët hijerëndë Otomanë vërshuan drejt Europës së Krishterë. Via Egnatia trashëgimia europiane që fati e bëri të kalonte mes nesh nuk mund të përfundojë e mbytur me asfaltin e injorancës.
Shikoni se si fqinjët tanë janë kujdesur për këtë mozaik të trashëgimisë Europiane. Maqedonia, Greqia e ruajnë me fanatizëm.
Shikoni si Italia e restauron dhe e mbron Via Apian simotrën e Egnatias që vinte nga Roma drejt Brundisiumit për tu lidhur me Egnatian.
Via Egnatia është Udha jonë për në Europë. Ju lutem vini dorë përpara se Europa të na shikojë me perbuzje për këto që po bëjmë ndaj Trashëgimisë së saj.
Foto
1. Via Egnatia e “restauruar” nga Bashkia Peqin
2. Pjese e Via Egnatia ne Maqedonine Veriore
3. Via Egnatia ne Filipi, Greqi,
4. Via Egnatia ne Kavalla Greqi,
5-7 Via Apia Rome” – shkruan Auron Tare.
