Eurodeputetja sllovene Tanja Fajon ka bërë një deklaratë të forte në seancën e sotme të Parlamentit Europian, ku është diskutuar mbi një draft-rezolutë për çeljen e negociatave të anëtarësimit për Shqipërinë dhe Maqedoninë e Veriut.
Ajo e cilëson një thikë pas shpine ndaj qytetarëve të Shqipërisë dhe Maqedonise së Veriut, premtimin e pambajtur nga BE për çeljen e negociatave.
“Premtime boshe, është gjithçka po shohim nga Bashkimi Europian kur flitet për Ballkanin Perëndimor dhe zgjerimin. Premtimet boshe janë thikë pas shpine ndaj qytetarëve të Maqedonisë së Veriut dhe Shqipërisë. Ka 10 vite që kur Komisioni Europian i premtoi Maqedonisë së mund të bëhej anëtare dhe unë jam e turpëruar që duhet t’u kërkoj falje qytetarëve të gjithë Ballkanit Perëndimor për këtë. Ne duhet të marrim përgjegjësitë dhe të diskutojmë se si do të vendosim mbi zgjerimin dhe duhet të rikuperojmë dëmet”, tha Fajon në Parlamentin Europian.
Më herët, eurodeputetja Fajon ka qënë reportere në proceset e liberalizimit të vizave për vendet e Ballkanit perëndimor, përfshirë edhe Shqipërinë.
