Nga Ardit Rada
Lulzim Basha ka shuar sot çdo mëdyshje nëse ai është një model ndryshe në drejtimin e PD, apo një imitues i Sali Berishës. Duke iu drejtuar publikisht qytetarëve nga bulevardi qëndror i Tiranës, Basha kërkoi një kundërpërgjigje të dhunshme ndaj cilitdo që sipas tij shkel të drejtat e njeriut.
Thirrjet e Bashës erdhën pas një largimi nga puna, që vetë kreu i demokratëve e bëri publik si rast. I diplomuari për Drejtësi në Hollandë nuk e ka ende të qartë se zgjidhjen për raste të tilla e jep Gjykata Administrative dhe jo dhuna ndaj institucioneve.
Duke kërkuar thyerje xhamash, hedhje gurësh, çpim gomash dhe grushte ndaj zyrtarëve, kreu i opozitës la të nënkuptohet se nuk ka asnjë marrëveshje me faktorin ndërkombëtar dhe se PD-së i janë prerë shpresat për të dalë nga çadra falë ndonjë negociate përmes Brukselit.
Tashmë çadra është izoluar rreth vetes dhe kushdo me të drejtë pret aktin ekstrem të dhunshëm, që Lulzim Basha e quan mosbindje civile, por që nuk ka asnjë lidhje me këtë të fundit. Format e protestës, juristi i shkolluar në Perëndim mesa duket nuk i ka të qarta… I gjithë mllefi i Bashës në fakt nuk ka të bëjë se ai nuk i njeh ligjet e shtetit.
Askush nuk i theu Lulzim Bashës ndonjë xham kur në Bashkinë e Tiranës shkarkoi edhe pastrueset. Lulzim Basha po përjeton vetminë e madhe në çadër ku dita-ditës Brukseli po i tërheq veshin ndërsa mazhoranca ka treguar indiferencë 7 ditët e para të protestës.
Një vit më parë ish-kryeministri Berisha i bëri thirrje shqiptarëve nga salla e Kuvendit për t’u armatosur. Deklaratat në fjalë, Sali Berisha i tërhoqi mbrapsht duke u justifikuar se ishte keqkuptuar. Sigurisht këtë e bëri përmes Edi Palokës.
Lebetitjet e sotme të Bashës nuk janë as më shumë dhe as më pak sesa retorika të dëgjuar nga PD qysh prej krijimit të saj. Fatkeqësisht të faktuara, sëpaku në vitin 1998. /JAVANEWS
