Ish-kryeministri Sali Berisha ka folur sërish për rikthimi e tij në krye të PD gjatë foltores së radhës në Kamëz.
Rikthimet në histori, Berisha tha se kanë qenë të suksesshme. Për të qenë më bindës para demokratëve, ai shtroi një pyetje të cilës iu përgjigj vetë, duke thënë se nga 2013 në 2021 te Berisha ka ndryshuar vetëm fakti që “fle më pak, punon më shumë dhe lexon më shumë”.
“Lidhur me rikthimin, misioni ynë është të krijojmë kushtet e një gare të lirë e të hapur, por jua siguroj se unë si shmangem asaj dhe garantoj demokratët se kurrë s’do i zhgënjej. Rikthimet në histori kanë qenë vetëm suksese, është e vërtetë se unë rikthehem pas 8 vitesh por nëse më pyet dikush çfarë ndryshimesh ka Berisha i 2013 me atë të 2021. Mund t’ju them se flej më pak se në 2013 punoj më shumë dhe lexoj më shumë. Sa i përket asaj që thashë do e kthej PD në partinë e lirisë ajo nënkupton vendimet e lira, rikonstrukturimin e saj”, tha Berisha.
“Ndaj dhe ne çfarë kërkojmë me Kuvendin tonë? Në radhë të parë të rikthejmë vlerat mbi të cilat jemi themeluar, të rikthejmë votën e lirë. Ne jemi ata që i sollëm Shqipërisë votën e lirë. Ne i kemi sjellë mbarë shqiptarëve dinjitetin njerëzor. Bëmë Shqipërinë të lirë. Ne këtë do të bëjmë përsëri, do të rikthejmë vlerat dhe liritë. Këtu nuk është një çështje personash, por parimesh, vlerash, të ardhmes. Kështu që, çdo demokrat dhe demokrate duhet të bashkohet në përpjekjet tonë për të mbajtur Kuvendin, për të vendosur rregulla që askush nuk i prek, rregulla të cilat respektojnë dinjitetin tuaj, votën tuaj, mendimin tuaj. Duhet ju t’i zgjidhni deputetët tuaj dhe duhet të zgjidhni atë që vlerësoni më shumë se vetëm në këtë mënyrë ai do të jetë deputeti juaj dhe jo i kryetarëve, do të vijë rregullisht te ju, do të vendosë një raport bashkëpunimi me ju”, shtoi ish kryeministri.
/b.h
