Nga Lorenc Vangjeli/
Me një ton dramatik dhe solemn Lulzim Basha dëshmoi se nuk ka kuptuar asgjë nga afera CEZ. Të premten në mesditë, kryetari i PD-së nuk mundi të ngrihet më lart edhe se posti i zëdhënësit të zëdhënësit me disa eprorë njëkohësisht. Zoti Basha fajësoi dyshen Rama-Meta si autore “të megavjedhjes së shqiptarëve” me lojërat e pacipa me sistemin energjitik. Me një aritmetikë politike ai llogariti humbjen nga xhepi i taksapaguesve që nisnin nga 600 milionë euro e nuk përfundonin tek dy miliard euro të tilla.
Normalisht, nëse Basha do të kishte të drejtë, autorët politikë të këtij skandali jo vetëm financiar, do të meritonin të kishin së paku nga 31 jetë dhe secilën prej tyre ta ngrysnin në qeli për ndëshkim. Madje pa të drejtë apelimi.
Basha tha se duke nisur nga e hëna do të prezantonte kërkesën për Gjykatën Kushtetuese për të nxjerrë si të papajtueshëm me dokumentin themelor të shtetit të ligjit që ndër të tjera, garanton imunitet për hetimin penal të shtetasve çekë dhe jo vetëm, që punonin dikur në Tiranë.
E vetmja gjë e qartë në këtë histori është se mbas “hetimit” në gjykatën e arbitrazhit, hetimit mediatik me shumë dritëhije sipas interesave që ende nuk kanë dalë në dritë, do të pasohet padyshim edhe hetime të tjera. Që prej fillimit të shtatorit e më tej, kjo është tashmë një çështje që nuk mbyllet dot me barazim, siç edhe mund të ketë ndodhur.
Po këtë javë, të mërkurën, rihyri në këtë poker ende me shumë letra të mbyllura për publikun, Doktor Berisha. Ish-kryeministri i privatizimit bëri sfidën e tij që shumëkush ja quajti blof: duhet një hetim ndërkombëtar për CEZ-in dhe gjithë aktorët dhe faktorët përfshirë në të.
Të enjten, ditën e Kurban Bajramit, Ilir Meta, një nga të akuzuarit e kësaj historie, pranoi këtë sfidë dhe e çoi më tej duke kërkuar edhe prokurorë amerikanë që të drejtonin hetimin. Në mënyrë që të bëheshin kurban të gjithë ata që kanë ndikuar në mekanizmin e grabitjes së publikut.
Të premten ambasada amerikane pohoi zyrtarisht se policia dhe prokurorët shqiptarë janë të vetmit përgjegjës për të drejtuar hetime në lidhje me çështje që ndikojnë popullin shqiptar dhe institucionet e tij dhe se asistenca e saj, nëpërmjet zyrës së OPDAT-it, “…afron këshilla ekspertësh, promovon reforma dhe nxit veprime të ndjekjes penale kundër korrupsionit”.
Kryeministri Edi Rama është për vizitë zyrtare në SHBA.
Po të premten, Lulzim Basha njoftoi nisjen e procedurave për ankimim në Gjykatën Kushtetuese duke folur për tangon kriminale në historinë e CEZ-it, riktheu në kujtesë një fjalë të paharrueshme në Tiranë.
Në fillim të viteve 70, ekzaktësisht në 14 tetor 1972, po në SHBA u shfaq premiera e një filmi befasues me titullin “Tangoja e fundit në Paris”. Marlon Brando dhe Maria Schnieder në rolet kryesore, të drejtuar nga Bernardo Bertoluçi, tronditën puritanët dhe ftuan edhe indiferentët në një udhëtim pasionant në misteret e seksit, në ato kthina dhe anekse të pandriçuara ku shumëkush kërkonte të hynte, por nuk dinte se ekzistonin.
Fati i filmit ishte i çuditshëm dhe po kështu edhe fati i dy aktorëve ishte shumë i ndryshëm. Brandoja, një ikonë e ekranit vazhdoi të mbetej i tillë, i duartrokitur dhe respektuar pafund, kurse bukuroshja adoleshente Schnieder – ishte vetëm 19 vjeç kur lëvizte mbi dysheme dhe nën Brandon – u përndoq për tërë jetën e saj dramatike për shkak të tabusë që kishte thyer. Ky film ka tronditur shumë jetë njerëzore edhe në Tiranë, kur nisi gati 15 vjet pas premierës. Ai erdhi në Tiranën e pasmesnatës në fund të viteve 80-të nga ekranet liberale të “sllavit” dhe u bë menjëherë, absolutisht një nga filmat më të komentuar dhe emblematikë të një brezi, pak më të madh në moshë se kryetari i ri i PD-së.
Basha foli të premten për një tango në Tiranë, por me një siklet të shfaqur haptazi në SHQUP tashmë. Eshtë mësuar se dikush pranë tij, fare pranë tij ka pilotuar në media një lajm për adresën në Tiranë ku flinte Josef Hajsek, ish-CEO çek i CEZ-it në Tiranë. Bëhet fjalë për një apartament luksoz në Tiranë që kushtonte pesë mijë euro qera në muaj tek godina e ETC-së, përballë ish-SHQUP-it të sotëm. Dhe për më shumë, në këmbim, një i afërt i pronarit të apartamentit të lëshuar me qera, flinte pa qera në vilën e Hajsek në periferi të Tiranës. Të dy këta janë shumë afër me një njeri të tretë shumë afër Bashës që ngjan se është dhe targeti kryesor i tij në trazimin e madh të CEZ-it dhe milionave të avulluara në drejtime shpesh shumë të ditura. Siç mund të dëshmojnë, veç të tjerve, edhe dy ministra. Njëri ish-ministër e deputet dhe tjetri ende në detyrë e ish-deputet. Njëri i goditur publikisht, tjetri i papërmendur ende.
E gjithë kjo histori ngjan si një film i Bernardo Bertoluçit. Madje me elementë fantastikë e dramatikë që e tejkalojnë edhe italianin e famshëm. E vetmja gjë e ngjashme me filmin e tij të dikurshëm, në fakt, është një element i vetëm: në të gjitha rrethanat Maria e ha dy herë!
