Policia afgane njofton se 14 të huaj janë vrarë gjatë një sulmi vetvrasës me bombë të kryer nga talibanët. Sulmi kishte objekt një autobus të vogël në kryeqytetin afgan, Kabul.
Zëdhënësi i ministrisë së brendshme, Sediç Seddiçi, ka thënë se tetë të tjerë janë lënduar në sulmin që ka ndodhur mëngjesin e të henes. Seddiçi ka thënë se autobusi bartte roje të sigurisë nga Nepali, të cilët punonin “për një kompani të huaj”, transmeton rel, cituar nga Express.
Automjeti është sulmuar në autoudhën kryesore që e lidhë Kabulin me qytetin lindor, Xhalalabad. Por, autoritetet kanë thënë se në automjet ka mundësi të ketë pasur edhe persona nga shtete të tjera, ndërsa ata janë duke u munduar që të identifikojnë nacionalitetin e të gjitha viktimave.
Ende nuk është e qartë se për cilën kompani punonin viktimat. Zëdhënësi i talibanëve, Zabihullah Muhaxhid ka thënë se ky grup militantësh është përgjegjës për sulmin, duke shkruar në rrjetin social, “Twitter”, se sulmuesi vetvrasës qëllimisht i ka pasur cak “rojet e pushtuesve të huaj”. (b.an)
