Zyrtarët talibanë në Kabul, njoftuan para pak minutash se një sulm ajror amerikan u krye të dielën e sotme dhe shënjestroi një automjet ku gjendeshin kamikazë të shumtë vetëvrasës nga filiali i Shtetit Islamik në Afganistan.
Edhe zyrtarët amerikanë thonë se një sulm me dron amerikan ka goditur një automjet që mbante disa kamikazë vetëvrasës të Shtetit Islamik që po shkonin drejt aeroportit të Kabulit.
Ky është sulmi i dytë ajror që SHBA ka kryer kundër grupit militant, i cili mori përgjegjësinë për shpërthimin vetëvrasës të enjten në hyrjen e aeroportit të Kabulit.
Sulmi u krye para se ata të sulmonin ekipet që po vazhdojnë evakuimin e ushtrisë amerikane në aeroportin ndërkombëtar të Kabulit, thanë zyrtarët që kanë marrë në kontroll vendin sërish pas 20 vjetësh.
AP sakaq raportoi se një raketë goditi një lagje në veriperëndim të aeroportit, duke vrarë një fëmijë.
Shtetet e Bashkuara përfunduan një transport ajror historik ku dhjetëra mijë njerëz u evakuuan nga aeroporti ndërkombëtar i Kabulit. Ky aeroport u bë skena e kaosit që përfshiu kryeqytetin afgan që kur talebanët morën kontrollin dy javë më parë.
Pas sulmit vetëvrasës të një anëtari të Shtetit Islamik që vrau mbi 180 njerëz, talebanët rritën sigurinë e tyre rreth aeroportit.
/b.h
