Ndonëse talebanët premtuan të drejtat e grave, lirinë e medias dhe amnistinë për zyrtarët qeveritarë në Afganistan një një konferencë për shtyp, aeroportet vijojnë të jenë të mbushur me qytetarë që duan të largohen nga vendi.
Vendet perëndimore kanë shtuar evakuuimet. Aeroplanët që mbanin qindra të evakuuar nga Kabuli mbërritën në Mbretërinë e Bashkuar dhe Gjermani. Një aeroplan i Forcave Ajrore Mbretërore Britanike që mbante shtetas britanikë dhe stafin e ambasadës zbarkoi në një bazë ajrore në Oxfordshire të Britanisë së Madhe.
Shtetet e Bashkuara thanë se me fluturimet e tyre ushtarake kishin evakuuar 3,200 njerëz nga Kabuli deri më tani, përfshirë 1,100 vetëm të martën.
Në Kabul, talebanët u përpoqën të flisinin me gjuhë pajtuese në konferencën e tyre të parë që nga “pushtimi” i rrufeshme që i bënë kryeqytetit afgan. Ata premtuan se do të respektonin të drejtat e grave “brenda kornizës së Islamit”, duke shprehur edhe dëshirën për marrëdhënie paqësore me vendet e tjera.
Njoftimet e talebanëve, të shkurtra në detaje, por që sugjeronin një linjë më të butë sesa gjatë sundimit të tyre 20 vjet më parë.
Sakaq, Presidenti i SHBA Joe Biden ka folur me kryeministrin britanik Boris Johnson për situatën në Afganistan. Të dy ranë dakord të zhvillojnë një takim virtual të udhëheqësve të G7 javën e ardhshme për të diskutuar një strategji dhe qasje të përbashkët.
Të dy udhëheqësit “diskutuan nevojën për një koordinim të ngushtë të vazhdueshëm midis aleatëve dhe partnerëve demokratikë në politikën e Afganistanit në vazhdim, duke përfshirë mënyrat se si komuniteti global mund të sigurojë ndihmë dhe mbështetje të mëtejshme humanitare për refugjatët dhe afganët që do evakuohen”, tha Shtëpia e Bardhë në një deklaratë.
Shtëpia e Bardhë tha se gjatë bisedës të së hënës udhëheqësit Biden dhe Johnson “vlerësuan trimërinë dhe profesionalizmin e personelit të tyre ushtarak dhe civil” të cilët po punojnë për të evakuuar qytetarët dhe aleatët e vendeve të tyre nga Afganistani. Vendimi i Presidentit amerikan Joe Biden, për t’iu përmbajtur marrëveshjes së tërheqjes së trupave ka ngjallur kritika të gjera në vend dhe midis aleatëve amerikanë.
/b.h
