Deputetja e Partisë Socialiste, Milva Ekonomi, në një intervistë për Vizion Plus ka folur mbi indesksimin e pensioneve dhe debatin për minimumin jetik të propozuar nga forcat opozitare.
Nga 1 tetori pensionet do indeksohen me 8.6 përqind por pyetja që lind është: Sa është kjo rritje në raport me inflacionin?
“Indeksimi i pensioneve vitin e kaluar u bë në dy hapa bnë prill dhe në tetor, edhe mbuloi më shumë se sa inflacioni tetor me tetor. Edhe këtë vit masa e indeksimit kalon më shumë se inflacioni tetor me tetor, kështu që kjo për mua është një nga ato llogaritjet që qeveria bën gjithmonë për të pasur në vëmendje pjesë të popullsisë së moshës së tretë, për t’i krijuar atyre mundësi më të mira më të shumta në sigurimin e shportës, konsumit që ata kanë”, tha ajo duke theksuar se ky indeksim i ndihmon ato në përballimin e kostos dhe rritjen e pensioneve.
A pritet të kemi edhe bonuse të tjera ndërkohë deri në fund të vitit për pensionistët?
“Përveç rritje së pensioneve sipas inflacionit, qeveria mendon vazhdimisht që pensionistët duhet të përfitojnë bonuse dhe në harkun kohor të 5 viteve të fundit, masa e bonuseve e subvencioneve sociale që i kanë kaluar moshës së tretë ka qenë rreth 310 milionë dollarë, duke filluar që nga bonusi i fundvitit duke vazhduar me bonusin e energjisë, duke pasur parasysh paketën e rezistencës numër 1, numër 2, që u bë vitin e kaluar, si dhe shpërndarjen e fitimit më të lartë, që përfituan firmat që merreshin me prodhim dhe shpërndarjen e energjisë elektrike”, thekson ajo. “Bonusi i fundit të vitit do të jetë patjetër pjesë e shpërndarjes, sepse është planifikuar pjesë e buxhetit të këtij viti”, shton ajo duke theksuar se pensionistët janë gjithmonë në vëmendjen e qeverisë.
Opozita por edhe lëvizje të reja politike kërkojnë minimumin jetik 200 euro: Sa realiste është kjo kërkesë?
“Minimumi jetik kërkon një matje statikore të vazhdueshme sipas disa standardeve që vendos në matje BE, së dyti ne bëjmë disa politika që synojmë të rrisim pagat si në sektorin publik, por edhe të iniciojmë në sektorin privat dhe së treti ajo që ne kemi menduar që në krye të herës është fakti që ne jemi për taksim të ndershëm, kështu me rritjen e pagës minimale dhe tavani i taksimit të ndershëm pëson ndryshime”, thekson ajo duke iu referuar edhe reformës në paga si dhe bonusit të bebeve.
Si qëndron indeksimi i pensioneve në raport me rritjen e pagës mesatare që pritet të arrijë 900 euro?
“Ato që janë me të ardhura të ulta po e rrisin mundësinë e tyre për të pasur nga rishpërndarja dhe ato që janë me të ardhura më të larta po paguajnë më shumë falë taksimit të ndershëm. Këto politika për taksim të ndershëm dhe të ardhura të mira do të jenë gjithmonë në fokusin tonë”, nënvizoi ajo.
/a.r
