Taksa për qentë, Veliaj- këshilltarit të PD: Shqetësohesh për qenin të Zenit
Një taksë, “për qentë e luksit”, pjesë e listës së taksave të Bashkisë së Tiranës është bërë shkak për debate mes kreut të Bashkisë, Erjon Veliaj dhe këshilltarit të djathtë Akil Kraja.
Kraja, duke diskutuar për këtë pjesë të rendit të ditës së Këshillit bashkiak e ka quajtur qesharake dhe absurde ‘taksën për qentë e luksit’.
“Mund ta shihni, e keni të shënuar, tani puna është se kush janë këta që ju quani qentë e luksit, kush i inventarizon këta qen, sa janë” ka thënë ai. Pas tij ka reaguar Veliaj, duke përdorur si argument qentë e Shkëlzen Berishës, djalit të ish kryeministrit.
“Një taksë e kryetarit tuaj në komuna Farkë që e ka për banorë të Farkës si Shkëlzen Berisha që ka 3 qen e një kalë nëse do t’i kthejmë lekët Zenit mos na e sillni propozim, mos prisni që qytetarët e Tiranës, t’i rimbursojnë Zenit taksën e qenit. Por njerëzit duan të mbarojnë punë përtej gallatës. Ti heqësh Zenit taksën e qenit, Bashkia ka halle të tjera. Të flasim për gjëra serioze. Ajo që dua të bëj është t’i jap drejtim çështjeve të Tiranës. Kjo është mbledhja për t’i hapur rrugë buxhetit. Taksa e qenit të zenit nuk është prioritet për Tiranën”, iu përgjigj Veliaj këshilltarit demokrat.
Shezai Rrokaj: Ne nuk do ta kthejmë Këshillin Bashkiak të Tiranës në qenë dhe në lesh. Unë them se ne duhet ta lëmë këtu se kam frikë që nëse debati do kalojë në një pjesë të lirë, do kalojë përtej qenit dhe leshit. Qytetarët sot nuk presin mesazhe me qenë dhe me lesh, por presin vendime të rëndësishme për jetën e tyre.
