Lufta kundër informalitetit, do të përfshijë edhe sektorin e banesave, ku shumica e qytetarëve jetojnë në godina të pa regjistruara, ndërsa edhe ata që kanë në pronësi një shtëpi, nuk e paguajnë taksën e saj. Referuar të dhënave të Censusit 2011, numri i banesave të banuara, në të gjithë vendin, ose ndryshe banesat e para, është 709.865 që do të thotë se vetëm nga shtëpia e parë, me taksën simbolike 1 euro, qeveria do të mund të arkëtojë rreth 700 mijë euro në vit.
Ndërsa për banesat e dyta, do të ketë një taksë tjetër, që sigurisht do të jetë më e lartë. Ende nuk bëhet e qartë se si do të funksionojë dhe se ku duhet ta derdhin qytetarët këtë detyrim, pasi është ende në fazë deklarate, por mund të ndiqet edhe një praktikë si ajo me taksën e televizionit e cila paguhet me faturën e dritave një herë në vit. Aktualisht taksa e pronës është disa herë më e lartë, ku për shembull për Tiranën, për ndërtesat para vitit 1993 është 15 lekë për m2 në vit dhe për ndërtesat pas vitit 1993 është 30 lekë për m2 në vit.
