Në rubrikën “Komenti i Ditës” në “Dritare TV”, gazetarja e njohur Rudina Xhunga na prezantoi me librin e zv.ministrit të Rendit, Aredin Shyti dhe kujtimet e tij. Shyti ndalet gjatë në burgun e Bënçës, tregon për njerëzit që takoi aty si Nexhmije Hoxha, anëtarët e Byrosë Politike, Fatos Nano.
Zonja Xhunga shprehet se kështu është njohur me Shytin për herë të parë, nëpërmjet shënimeve të burgut të Nexhmije Hoxhës, e cila tregonte se si ai kishte arritur ta bënte burgun njerëzor.
“Aredin Shyti, Ish-zëvendës ministër i Rendit, i dënuar më 2 prill, babai i dy djemve të dënuar për Hakmarrjen për Drejtësi, që më pas morën çlirimin nga të gjitha akuzat në vitin 2017. U takua me djemtë 14 vite më pas, pas shumë kohësh arratie, përgojimesh. Njeriu që 45 vjeç praktikisht mbylli jetën sepse në atë kohë përfundoi në burgun e Bënçës, në kohën e Sali Berishës. Kështu e njoh unë Aredin Shytin. E njoh nga shënimet e burgut të Nexhmije Hoxhës. Aty lexova për herë të parë për njeriun që ajo e takoi për herë të parë në burg sepse kishte ndryshuar gjithçka në burgun e Bënçës. Kishte bërë një kopsht me lule, e kishte bërë të jetueshëm, njerëzor.
Aredin Shyti ka bërë një libër, i cili të lë mbresa të forta. Jo thjesht për çfarë tregon, sepse kjo është subjektive, secili ka kujtimet e tij dhe ato nuk gjykohen. Unë nuk do të flas se çfarë mendoj unë për gjërat që ai thotë. Por mënyra se si ai e thotë është e veçantë. Teksa e lexoja më dukej sikur njihesha me kujtimet e një homologut të tij francez, shkruan me të njëjtën përgjegjshmëri, siç i shikojmë në filma njerëzit që punojnë me krimin”, u shpreh Rudina Xhunga./m.j
