E Ngarkuara me Punë e Ambasadës Amerikane, Nancy VanHorn, ka pritur në një takim këtë të martë, më 16 dhjetor, ministren e Arsimit Mirela Kumbaron.
Përmes një njoftimi nga ambasada, bëhet me dije se VanHorn dhe Kumbaro diskutuan mbi ndarjen e ekspertizës amerikane, mbi të gjitha në fushën e sigurisë kibernetike dhe kriminologjisë.
“Sot, e Ngarkuara me Punë Nancy VanHorn diskutoi me Ministren e Arsimit Mirela Kumbaro mbi mënyrat e shumta se si Ambasada e Shteteve të Bashkuara mund të ndajë ekselencën dhe ekspertizën amerikane me Shqipërinë. Nga partneritetet afatgjata me Korpusin e Paqes dhe Akademinë e Sigurisë, te kurrikulat e reja në fushën e sigurisë kibernetike dhe kriminologjisë, programet tona po zhvillohen vazhdimisht për të forcuar bashkëpunimin mes Shteteve të Bashkuara dhe Shqipërisë mbi qëllimet e përbashkëta.”, thuhet në njoftimin e ambasadës.
Sjellim ndërmend se herë pas here Ambasada Amerikane ka ofruar trajnime mbi të gjitha në këto fusha, për ekspertët shqiptarë. Përmendim këtu, trajnimin e 400 oficerëve shqiptarë për Hetimin e Krimeve, apo trajnimin e tetë anëtarëve të Gardës të zhvilluar nga Shërbimi Sekret Amerikan.
