Brenda pak orësh, Presidenti amerikan Donald Trump do të takohet ballë për ballë me atë rus Vladimir Putinin në Anchorage, ku përveç luftës në Ukrainë, pritet të diskutohet mundësia e një marrëveshjeje të re për armët bërthamore si pjesë e një përpjekjeje më të gjerë për forcimin e paqes.
Putin e sheh fundin e mundshëm të luftës si pjesë të një pakete më të madhe çështjesh sigurie që kanë çuar tensionet Lindje-Perëndim në nivelet më të rrezikshme që nga Lufta e Ftohtë.
Me trupat ruse që përparojnë ngadalë në Ukrainë, ai ka refuzuar një armëpushim të menjëhershëm, por një marrëveshje për kontrollin e armëve mund t’i shërbejë për të bindur Trump-in të mos vendosë sanksione të reja ndaj Rusisë.
Putin ka përdorur shpesh retorikë bërthamore, duke paralajmëruar se një përplasje e drejtpërdrejtë me Rusinë mund të çojë në Luftën e Tretë Botërore. Rusia zotëron rreth 4.309 koka bërthamore, më shumë se çdo vend tjetër, ndërsa SHBA-të kanë rreth 3.700.
Traktati aktual New START, i nënshkruar në 2010-ën dhe i zgjatur deri në 2026-ën, kufizon secilin vend në 1.550 koka bërthamore strategjike dhe 700 raketa e bombardues të gjatë. Putin pezulloi pjesëmarrjen në 2023-in, por Moska deklaron se ende respekton kufijtë. Traktati skadon më 5 shkurt dhe analistët paralajmërojnë se të dyja palët mund t’i tejkalojnë kufijtë nëse nuk rinovohet.
Tensionet janë rritur edhe nga planet e SHBA-ve për të vendosur në Gjermani, nga 2026-a, raketa të mesme dhe me rreze të shkurtër, përfshirë Tomahawk dhe armë hipersonike, ndërsa Rusia ka deklaruar se nuk kufizohet më në vendosjen e raketave të saj.
