Deklarata e nënshkruar nga katër liderët shqiptarë – Ali Ahmeti i BDI-së, Bilall Kasami i Lëvzijes BESA, Ziadin Sela i Aleancës për shqiptarët, si dhe Fadil Zendeli i RDK-së dje pasdite në Tiranë gjate takimit te organizuar nga kryeministri i Shqipërisë, Edi Rama, permban mjaft elemente qe lidhen me qasjet per zgjidhjen e krizes ne Maqedoni.
“Duke respektuar vullnetin e lirë dhe demokratik të votuesve shqiptarë, në frymën e Marrëveshjes së Ohrit dhe nevojës për të përmbushur detyrimet që rrjedhin nga ndryshimet kushtetuese, të përcaktuar pa asnjë alternativë tjetër për integrim në NATO dhe në BE, biem dakord për përkrahje të ndërsjellë të agjendës së përbashkët politike që parashikon realizimin e objektivave që vijojnë në mandatin e ardhshëm qeverisës dhe në çdo mandat tjetër pasues”, theksohet ne deklarate.
Deklarata të cilën e ka publikuar gazeta “Koha” e Shkupit parasheh pika të rëndësishme të shqiptarëve, të cilat patjetër do t’i dorëzohen mandatarit nga pala maqedonase në bisedime për formimin e Qeverisë.
“Arritja e barazisë së plotë në përputhje me Marrëveshjen e Ohrit, përfshirja e parimit të multi-etnicitetit në Kushtetutën e Maqedonisë, ku shqiptarët të njihen si popullsi shtet-formues, arritja e barazisë së plotë gjuhësore, përdorimi i gjuhës shqipe në të gjitha nivelet e qeverisjes dhe garantimi përdorimit të saj si e drejtë themelore, përdorimi i simboleve kombëtare shqiptare (flamuri dhe stema)”, parasheh pika e parë e Deklaratës, për të cilën katër liderët shqiptarë kanë rënë dakord.
Buxheti dhe zhvillimi i barabartë i rajoneve të banuara me shqiptarë zënë vend të rëndësishëm në këtë Deklaratë, e cila në takimin e radhës pritet të firmoset edhe nga lideri i PDSH-së.
“Arritja e barazisë ekonomike dhe e mirëqenies shoqërore, sidomos nëpërmjet zhvillimit të barabartë rajonal, krijimi i një mekanizmi të ri në formën e një Komisioni shtetëror për financimin e komunave, për një vendimmarrje më të drejtë dhe miratimin me shumicën e dyfishtë për grantet qeveritare në përfitim të komunave…”, shkruan Deklarata.
Deklarata e firmosur parasheh gjithashtu themelimin e një Ministrie për Komunitetet, si organ përgjegjës për respektimin e të drejtave të komuniteteve dhe nxitjen e zhvillimit ekonomik dhe shoqëror në zonat e defavorizuara. Veç kësaj, Deklarata obligon partitë shqiptare për përfaqësim të drejtë në organet e sigurisë-policisë dhe në ato të drejtësisë.
Gjithashtu, vend të rëndësishëm ka zënë edhe financimi i kulturës dhe aktiviteteve kulturore shqiptare, si në nivelin lokal, ashtu edhe në atë qendror. Madje, kërkohet edhe krijimi i një institucioni qendror për avancimin e gjuhëve të komuniteteve, i cili do të sigurojë përgatitjen e përkthyesve, redaktorëve dhe lektorëve. Deklarata përfshin edhe angazhimet për integrimin e shpejtë në NATO dhe në BE.
Me. Ar
