Kryeministri Edi Rama ka ftuar në një takim konsultues për pushtetin vendor të gjithë kandidatët fitues në 61 njësitë e reja vendore. Kryebashkiakët e rinj janë njoftuar që takimi do të zhvillohet në selinë e Kryeministrisë ditën e hënë, në orën 12:00.
Ndërkohë një pjesë e kryebashkiakëve të djathtë kanë thënë se nuk do të jenë pjesë e këtij takimi.
Kryetarja e Bashkisë së Shkodrës, Voltana Ademi, ka theksuar se nuk është në dijeni të këtij takimi që Kryeministri pritet të zhvillojë. Nga ana tjetër kryebashkiaku i Kamzës, një prej vendorëve më të akuzuar nga Kryeministri Rama gjatë fushatës zgjedhore, bën të ditur se nuk do të jetë pjesë e takimit, edhe në rast se do të marrë një ftesë.
Drejtuesi i ri i Bashkisë së Lezhës, Fran Frrokaj, konfirmon ftesën e marrë nga Kryeministri Rama, madje pranon se është i gatshëm edhe të jetë pjesë e këtij takimi.
Të njëjtin qëndrim për këtë takim ndan edhe kryebashkiaku i ri i Kukësit, Bashkim Shehu. Kjo mbledhje e kërkuar nga Kryeministri Rama, që pritet të ketë në qendër të diskutimeve implementimin e ri të reformës territoriale, shihet si një mënyrë për t’u dhënë fund aludimeve të kreut të opozitës, i cili garantonte se pas zgjedhjeve kreu i qeverisë nuk do të bashkëpunonte me të zgjedhurit e PD-së.
