Pas takimit që ka zgjatur për më shumë se 2 orë e gjysëm mes kryetarit të Bashkisë së Tiranës Erion Veliaj dhe përfaqësuesve të bizneseve, duket se palët kanë gjetur gjuhën e përbashkët.
Në fund të diskutimeve të vështira, palët ranë dakord që të bëhet një rishikim i vendimit për rritjen e taksave.
Ndërkohë, ditën e hënë pritet një tjetër takim mes palëve, kur përfaqësuesit e bizneseve do të depizitojnë në bashki propozimet e tyre.
Po ashtu në këtë takim është diskutuar edhe ideja e marrjes me qira sezonale të sipërfaqeve të caktuara.
“Do vendosim rradhën e pikave që do u çohet. Nga ana e bashkisë pati gadishmëri për ta negociuar edhe pse e ngurtë por një derë u la e hapur. Nëse nuk merren parasysh kërkesat që do çojmë atëherë biznesi do jetë në shesh,” tha Adriatik Lapaj, një nga negociatorët në takim.
Ndërsa kreu i Shoqatës së Tregtarëve Nikollaq Neranxi tha se debati ishte për të gjitha taksat. Sipas tij propozimet e biznesit ishin që taksat të bëhen siç kanë qenë. “Ata nuk donin që t’i linin me tarifat e para por mendoj se të hënën ne do ta zgjidhim,” tha ai para tregtarëve.
SHOQËRIA CIVILE: SHFYQIZIM TË VENDIMIT, NDRYSHE PËRSHALLËZIM PROTESTASH
Përfaqësuesi i shoqërisë civile, Besjan Pesha, në një prononcim për ‘Neës 24’ theksoi se vendimi për rritjen e taksave është marrë në errësirë dhe pa u konsultuar fare me biznesin. Pesha nga ana tjetër deklaroi se nëse ky vendim nuk shfuqizohet, do të ketë përshkallëzim të protestave, deri në një përgjigje pozitive.
