Nënshkruhen mes qeverisë italiane dhe asaj shqiptare 16 marrëveshje bashkëpunimi dhe memorandume, në kuadër të partneritetit të ngushtë strategjik mes dy vendeve.
Kryeministri Edi Rama u prit këtë të enjte në një ceremoni zyrtare nga kryeministrja italiane Giorgia Meloni, në Romë. Kjo ishte mbledhja e parë e dy qeverive, Italiane dhe asaj shqiptare.
Marrëveshjet e nënshkruara
-Bashkëpunimi strategjik në fushat e shëndetësisë, energjisë, mjedisit, sigurisë, arsimit dhe inovacionit
-Siguria kibernetike, përmes një memorandumi mirëkuptimi ndërmjet ministrive të jashtme
-Mbrojtja civile, me disa marrëveshje për grante dhe hua të buta, mbështetje në pajisje dhe trajnim, si dhe një deklaratë të përbashkët mbi koordinimin institucional
-Shëndetësia, me projekte për përmirësimin e kujdesit neonatal dhe maternal
-Mbrojtja dhe bashkëpunimi ushtarak, përfshirë transferimin e mjeteve detare dhe marrëveshje mes kompanive “Leonardo”, “Fincantieri” dhe partnerëve shqiptarë
-Lufta kundër trafikut të drogës, që përfshin një Memorandum mirëkuptimi të nënshkruar mes Institucioneve të punëve të brendshme respektive
-Zhvillimi ekonomik, përmes instrumenteve të “Cassa Depositi e Prestiti”, “SIMEST” dhe “AIDA”, në mbështetje të ndërmarrjeve të vogla dhe të mesme shqiptare
-Kultura dhe kreativiteti, me një marrëveshje bashkëpunimi midis Fondacionit MAXXI dhe institucioneve shqiptare të artit.
