Kryeministri i Kosovës, Albin Kurti, raporton në Kuvend ditën e sotme për takimin e Ohrit.
Kurti u shpreh se Kosova duhet ta shfrytëzojë sa më mirë dokumentin e ri që ka dalë nga takimet e fundit mes tij dhe Vuçiç me ndërmjetësimin e BE-së.
“Tani kemi një dokument të ri në dorë dhe duhet ta shfrytëzojmë sa më mirë. E kemi një dokument të ri çfarë ka qenë i paparë dhe i paarritshëm më herët dhe kjo është edhe “armë” e fuqishme për ne për të ecur përpara. Me dokumentet e hershme kemi ngecur. Me këtë dokument mund të ecim”, tha Kurti.
Kurti: Rruga jonë e anëtarësimit në organizata ndërkombëtare më e lehtë, por s’do jetë shëtitje në park
Në fjalën e tij në Kuvend, kryeministri i Kosovës Albin Kurti theksoi se ka bërë ç’është e mundur për të nënshkruar një marrëveshje që garanton njohjen reciproke sa i takon raporteve me shtetin serb.
Ai u shpreh falenderues ndaj shteteve mbështetëse në këtë proces të vështirë, duke shtuar se tashmë Kosova e ka më të lehtë rrugën e anëtarësimit në organizata ndërkombëtare.
“Kush po mundohet për kë më shumë? Nuk na pëlqen aspak kjo dinamikë, por pylli nuk duhet të injorohet për shkak të pemëve, në plan afatgjatë ne jemi më mirë me këtë marrëveshje.
Kjo është dhe arsyeja pse unë si kryeministër kam thënë që jam për dialog dhe marrëveshje që nënshkruhet sa më parë, që tani. Më shumë se kaq, më konstruktiv se kaq, nuk ka qenë e mundur. Jam kritikuar për propozimin e një marrëveshjeje që nuk është përfundimtare. Natyrisht që me gjithë dijen, fuqinë që kemi, vendosëm se duhet t’i themi “Po” marrëveshjes bazë drejt një marrëveshjeje finale.
Njohja de-facto është e qartë, nuk është më pjesë e deklarimeve, por përcaktohet në nenin 6 të kësaj marrëveshjeje. Nuk ka zyrtar evropian dhe amerikan që nuk e thotë se normalizimi i plotë nuk reflekton njohjen reciproke. Serbia mund dhe të injorojë haptaz marrëveshjen, rruga jonë drejt anëtarësimit në organizata ndërkombëtare është lehtësuar, por nuk do të jetë shëtitje në park, çdo vend do kërkojë më shumë sepse Serbia do vazhdojë të lobojë kundër.
Por, ndryshe nga Serbia, Kosova nuk ka hezitim se adresa e saj e vetme është Europa, NATO, lidhja trans atlantike. Falenderoj partnerët tanë negociues në këtë proces të vështirë dhe ekipet e tyre, shtetet mbështetëse si Gjermania, Franca dhe Italia. Në veçanti falenderoj përfaqësuesin special të SHBA-së që ka qenë gjithmonë i pranishëm në këtë proces”, u shpreh Kurti.
/a.r
