Lideri i opozitës shqiptare dhe Kryetari i Partisë Demokratike, Sali Berisha, ka zhvilluar një sërë takimesh në Bruksel, ku ka ngritur alarmin për atë që e cilësoi si një “krizë të thellë demokratike” në Shqipëri. Gjatë vizitës së tij në Parlamentin e Rajonit të Brukselit dhe në Parlamentin Federal të Belgjikës, Berisha akuzoi qeverinë e Kryeministrit Edi Rama për përqendrim të pushteteve, manipulim të proceseve zgjedhore dhe lidhje me krimin e organizuar.
Në takimin zyrtar me Presidentin e Parlamentit të Brukselit, Bertin Mampaka, kreu i opozitës bëri një ekspoze të situatës politike në vend. Duke iu referuar raporteve ndërkombëtare, veçanërisht atij të Institutit V-Dem, Berisha theksoi se klasifikimi i Shqipërisë si një “autokraci elektorale” është një kambanë alarmi për të ardhmen evropiane të vendit.
Sipas liderit demokrat, Shqipëria vuan prej më shumë se një dekade nga mungesa e zgjedhjeve të lira dhe të ndershme. Ai denoncoi atë që e quajti një fushatë të hapur goditjeje ndaj opozitës, duke kujtuar arrestimin e tre liderëve opozitarë gjatë vitit elektoral. Berisha solli në vëmendje edhe shqetësimet e ngritura nga misionet vëzhguese të Parlamentit Evropian mbi ndikimin e drejtpërdrejtë të krimit të organizuar në deformimin e vullnetit të zgjedhësve.
Sipas njoftimit për shtyp, nga ana e tij, Presidenti Mampaka vlerësoi kontributin e Berishës në mbrojtje të pluralizmit dhe transparencës. Ai garantoi se shqetësimet e ngritura nga delegacioni shqiptar do të përcillen në Parlamentin e Brukselit dhe në nivele të tjera të qeverisjes federale, me qëllim rritjen e ndërgjegjësimit mbi situatën reale në Shqipëri.
Eksporti i krimit dhe akuzat për korrupsion
Në një prononcim për mediat pas takimeve me anëtarë të Komisionit të Jashtëm në Parlamentin Federal, Berisha u ndal tek një tjetër fenomen shqetësues: fuqizimi i karteleve të drogës. Ai paralajmëroi ligjvënësit belgë se grupet kriminale shqiptare kanë shtrirë tentakulat e tyre nga Amerika Latine drejt porteve evropiane, duke u kthyer në një kërcënim rajonal dhe evropian.
“Paratë e krimit dhe trafikut të drogës po deformojnë ekonominë, veçanërisht përmes pastrimit në sektorin e ndërtimit,” theksoi Berisha. Ai e lidhi këtë situatë me dështimin e luftës ndaj korrupsionit në nivelet e larta, duke denoncuar refuzimin e mazhorancës socialiste për t’i hapur rrugë drejtësisë pas kërkesave të SPAK.
Lideri i PD-së solli në vëmendje edhe raportimet e fundit në mediat belge që implikojnë emrin e Kryeministrit Rama në çështje dhuratash luksoze, si rasti i përfolur i një ore me vlerë 600 mijë euro.
Si rrugëdalje nga ky ngërç i thellë politik dhe institucional, Partia Demokratike thekson domosdoshmërinë e krijimit të një qeverie teknike. Për opozitën, kjo është e vetmja garanci për të organizuar zgjedhje të standardeve evropiane.
Berisha riafirmoi qëndrimin se integrimi në Bashkimin Evropian mbetet “ylli polar” i PD-së, por kushtëzoi progresin e këtij procesi me rikthimin e shtetit të së drejtës, respektimin e lirive qytetare dhe një luftë me zero tolerancë ndaj krimit. Për shkak të kësaj situate—nënvizoi ai—mbi 1.1 milionë shqiptarë kanë zgjedhur rrugën e emigrimit drejt BE-së gjatë dekadës së fundit.
Gjatë kësaj vizite, kreu i PD-së shoqërohej nga deputetët Albana Vokshi dhe Belind Këlliçi, Sekretari për Marrëdhëniet Ndërkombëtare Enri Ceno, si dhe përfaqësues të komunitetit shqiptar në Belgjikë.
