Presidentja e përkohëshme e Kosovës Vjosa Osmani, përpos takimit me krerët e lartë të shtetit Ilir Meta e Edi Rama, si dhe kreun e opozitës Lulzim Basha, e ka zbritur nivelin e takimit te një ish deputet.
Bëhet fjalë për takimin e realizuar mes Osmanit dhe ish kryeministrit të Shqipërisë, Sali Berisha.
Mbetet mister fakti se cili ka qënë qëllimi zyrtar i këtij takimi, pse është futur në axhendë takimi me ish kreun e qeverisë së Shqipërisë,i cili ka qënë një ndër kundërshtarët më të vendosur të UÇK, zëdhënës i zëdhënësit të së cilës ka qënë për pak kohë dhe Albin Kurti.
Nuk po themi që Osmani të takonte dhe ish kryeministrin Fatos Nano, njeriun që ka kontribuar fort gjatë periudhës së luftës së Kosovës me të gjitha mjetet, por sëpaku të kishte takuar Pandeli Majkon, i cili aktualisht është dhe ministër i Diasporës dhe përgjigjet për të gjithë shqiptarët jashtë territorit të Shqipërisë. Sipas preambulës së Kushtetutës sonë e bën këtë!
E kishte fare të lehtë ta përfshinte në axhendë, pasi nëse Vjosa Osmani për tre ditë ka folur më shumë se tërë jetën e vet për qëndrimin e Shqipërisë ndaj Kosovës, çlirimit të saj nga okupimi serb, rezistenca ndaj “ndarjes”, Pandeli Majko ka qënë njeriu më i përshtatshëm për t’u takuar.
Majko ka qënë kryeministër në kohën e luftës në Kosovë dhe njeriu që shokoi mediat e politikën botërore kur tha se “jemi gati të presim në Shqipëri mbi 1 milionë shqiptarë të Kosovës të deportuar nga forcat militare dhe paramilitare serbe përmes skenarit të famshëm “patkoi”.
Nëse nuk do të kishte kohë Presidentja e përkohëshme e Kosovës, mund të kishte hequr nga axhenda ish kryeministrin Sali Berisha dhe të kishte futur vetëm Pandeli Majkon.
Do të kishte “shpëtuar” dhe vizitën e saj të dështuar, e cila do të bëhet pjesë në analet e historisë për fjalorin më të ashpër që ka mbajtur një kryetar shteti i botës gjatë vizitës në Shqipëri.
Duke ia kaluar madje dhe gjuhës së Nikita Hrushovit përballë Enver Hoxhës./a.p
