Presidenti i Skënderbeut, Ardjan Takaj, në një intervistë në emisionin “Ora Skaner” në “Ora News” ka folur gjerësisht për çështjen e dënimit të Skënderbeut nga UEFA me mospjesëmarrje për 1 vit në kupat e Europës.
Gjatë intervistës ai zbulon se klubi korçar ka qenë nën përgjim nga UEFA për një periudhë 1-2 vjeçare, përgjim që sipas tij është kryer në bashkëpunim me autoritetet shqiptare.
Ndërkaq Takaj e cilëson si të turpshëm faktin që në raportin e UEFA-s për trukimet e ndeshjeve përmenden emrat e Ridvan Bodes, Agim Zeqos dhe Bledi Shkëmbit.
Po prisni se janë 6 vite hetime. Edhe një njeriu, nëse mbyllet brenda në shtë- pi për 6 vite, por ndërkohë e mban nën hetim, atëherë diçka do t’i gjesh. Megjithatë, unë nuk shoh ndonjë gjë aty që, megjithëse për 6 vite hetim, të ketë diçka bindëse.
Ka ndonjë përgjim?
Kemi qenë edhe nën përgjim nga UEFA, por nuk ka asgjë të parregullt.
Cilët kanë qenë në përgjim?
Telefonat tanë, për një vit apo dy vjet… por nuk ka asnjë tabulat të dyshimtë.
Keni pasur dijeni për këtë?
Jo, asnjë dijeni. Thjesht e kemi lexuar në raport.
Kjo do të thotë se ka pasur një rakordim edhe me autoritetet shqiptare, sepse telefoni është diçka private…
Po, kështu është.
Pse jeni kaq i bindur se nuk ka prova të tjera, se nesër mund të dalin gjëra të tjera…?
Sepse unë jam pjesë e këtij ekipi dhe, kur unë them se nuk mund të ketë, atëherë nuk ka… nëse do të kishte gjëra të tjera, do të kishin dalë.
Përmenden shumë emra në raport…
Po, dhe le t’i marrim me radhë. Përmendet Bode… Kjo është e turpshme, sepse t’i thuash ministrit të Financave se ke trukuar, apo se ke financuar një ekip, kjo është tërësisht e pavërtetë. Nuk ka logjikë, sepse klubi administrohej nga bashkia që ishte e majtë (sot Peleshi është zv.kryeministër), por ndërkohë thoshin se e financon një ish-ministër i djathtë… pa sens fare.
Jam akuzuar unë, Zeqo dhe Bode duke na thënë se ne e privatizuam klubin… Kjo, tërësisht e pavërtetë. Këto janë akte ligjore dhe të vërtetueshme… Ka edhe disa emra në raport që nuk i njoh fare. Nuk i kam dëgjuar më parë. Po ju them se Ardjan Takaj nuk ka shkuar kurrë në Prokurori, madje as nga fisi im kurrë asnjë në Prokurori. Mirëpo, ka një tendencë shumë të fortë ndaj nesh.
Cilët janë këta persona?
Nuk e di, po ta dija do t’i denoncoja. Nëse e marr vesh, do t’i denoncoj fort. Nuk mund të më akuzojnë për gjëra qesharake.
Është përmendur Shkëmbi…
Fatkeqësi. Një jetë si futbollist, kapiten i madh, ka fituar tituj dhe ka dhënë gjithçka në fushë dhe, në fund, përmendet për një gjë që nuk ka lidhje. Prandaj ai raport ishte qesharak.
Starova dhe te Partizani kanë kërkuar titullin?
Unë nuk e di se çfarë kërkojnë ata, por Starova dhe të tjerët e dinë që titulli fitohet në fushë e jo në tavolinë. Ndoshta nuk u kujtohet se si fitohet një titull se kanë 24 vite pa e shijuar një të tillë…
Partizani thotë “na njohu UEFA”…
Partizani nuk e di se si luajti në dy kompeticione. Rast i parë kur një ekip nga Liga e Europës kalon në Champions. Madje, morën edhe të ardhurat e Liga e Europës, kur ato i takonin Tiranës. Sepse, me zhvendosje logjike, ishte ajo skuadra që duhej të hynte në Europë pas pezullimit të Skënderbeut. Por ata shkuan atje dhe i morën, ne nuk kemi gjë me këtë, përkundrazi edhe i uruam që kaluan një tur.
Jeni i sigurt që nuk jua heqin titullin, sepse mund të hyjë në lojë Komisioni i Etikës?
Etika nuk është organ më i lartë se Apeli i UEFA-s dhe as se KAS-i. Jam shumë i sigurt.
Por UEFA thotë se e ka në dorë FSHF-ja…
Eh, nuk e di. E kanë nxjerrë këta të TVSH-së, se këta kanë kohë që të merren me këto gjëra. U çudita, sepse UEFA na thotë që këto janë konfidenciale dhe, më pas, nxjerr gjëra që nuk duhet të dalin… Por, nëse futbollit i heq besimin dhe i trondit besimin, atëherë i bie të jemi kthyer 20 vite mbrapa. Me këtë raport që ndodhi, mendoj se ka ndodhur pikërisht kjo, jemi kthyer mbrapa.
Akuza nga Prokuroria janë ngritur?
Jo, thjesht po menaxhohen të dhënat. Nuk e di se si ka hyrë Prokuroria. Nëse ka hyrë si e pavarur, nuk do të ketë akuza. Nëse hyn e ndikuar nga instrumente të tjera, atëherë çfarë nuk ndodh. Por unë kam besim te drejtësia.
A keni menduar ndonjëherë të largoheni?
Ndoshta para dy vitesh. Kisha dy vite unë, ndërkohë që dy të tjerë i kish kaluar Zeqo. Më dukej shpenzim i madh dhe kohë shumë e madhe e konsumuar.
Si e vlerësoni raportimin e medias në gjithë këtë?
Shumë agresive. Së pari, Skënderbeu përbën lajm, por edhe për faktin që Skënderbeu nuk është i rrethuar nga të fortë apo kriminelë. S’e kam fjalën pse publikoi raportin. Ai është një lajm i madh dhe unë po të isha, do ta kisha publikuar, por e kam fjalën në tërësi. Shumë të ashpër dhe shpeshherë selektivë, jo njësoj me të gjithë.
ma.me
