Një tajfun i fuqishëm ka goditur sot në mëngjes pjesën veriore të Filipineve, duke shkatërruar gjithçka që i ka dalë përpara. Sipas BBC, shumë shtëpi janë rrafshuar krejtësisht, linjat elektrike kanë rënë dhe si pasojë mijëra njerëz kanë braktisur shtëpitë e tyre. Tajfuni i madh e i ngadalshëm në lëvizje goditi fillimisht qytetin Kasiguran, në ishullin Luson. Parashikohet se tajfuni Koppu do të sjellë për tri ditë me radhë rreshje të mëdha shiu, duke shkaktuar përmbytje të mëdha dhe rrëshqitje të dheut. Alexander Pama kreu i agjencisë kryesore të fatkeqësive në vend, ka thënë se 10 mijë persona janë zhvendosur në veri-lindje të Lusonit. Fatmirësisht, deri tani nuk ka pasur viktima në njerëz.
