Në fund të 2017-ës në Shqipëri nuk do të ketë më asnjë qytetar që përdor makinën që të mos jetë i lidhur me rripin e sigurimit. Ministri i Punëve të Brendshme Saimir Tahiri tha se kjo është një betejë që sipas tij policia do ta fitojë patjetër.
Ministri ishte i pranishëm në një operacion të koduar “Blici rrugor” të shtrirë në 12 qarqet e vendit në akset kryesore dhe zonat urbane, i cili zgjat 2 orë. Nga Durrësi, ministri tha se paralelisht me masat sensibilizuese do të aplikohen edhe ato ndëshkuese për mos vendosje të rripit të sigurimit, duke bërë të ditur se 30 mijë qytetarë kanë marrë gjobë për këtë shkelje.
“Edhe këtë vit do të punojmë për t’i bindur qytetarët se duhet vënë rripi i sigurimit. Është një sfidë madhore, dhe betejë që do e fitojmë patjetër. Më fund të këtë vitit mos lidhja e rripit të sigurimit mos të ketë asnjë lidhje me Shqipërinë. S’do ketë me përdorues rruge me makinë që nuk do përdorin rripin”, u shpreh ai.
Duke ju përgjigjur akuzave për masa të larta ndëshkuese, ministri bëri një apel ndaj qytetarëve kur tha se gjëja e parë që duhet të bëjnë sapo të hipin në makinë, është vendosja e rripit.
“Ata që s’janë bindur do ndëshkohen maksimalisht”, – vijoi ai.
Në vitin 2016 – theksoi ministri – 29 jetë qytetarët janë shpëtuar në aksidente rrugore për shkak se kanë pasur të vendosur rripin e sigurimit gjatë udhëtimit me makinë.
Në aksionin për vendosjen e rripit, Policia e Qarkullimit Rrugor është mbështetur nga Policia e Rendit dhe Shqiponjat, ku sot janë angazhuar rreth 780 punonjës Policie në total në 165 pika kontrolli në të gjithë vendin.
Operacioni ka për qëllim rritjen e parametrave të sigurisë rrugore, ndërgjegjësimin e qytetarëve për rëndësinë e vendosjes së rripit të sigurimit por edhe të respektimit të rregullave të qarkullimit rrugor./b.d
