Zgjedhjet shumë shpesh janë kompromentuar pasi mungesa e adresave të sakta të qytetarëve ka lënë shteg për veprime të paligjshme.
Kështu është shprehur Ministri i Brendshëm Sajmir Tahiri në prezantimin e projektit për regjistrin e shtetasve. Tahiri tha se pasurimi i të dhënave dhe përditësimi i tyre kanë qenë kaherë një problematikë e vendit.
Të dhënat e deritanishme në sistemin e regjistrit të shtetasve janë përditësuar për herë të fundit në vitin 2007, një arsye kjo që për Ministrin e Brendshëm ndikon në kapacitetin e institucioneve për të dhënë shërbime për qytetarin.
“Ju shumë mirë e dini që në lista zgjedhore jeni mësuar gjithë këto kohë të keni kodin specifik, 999. Ata janë shtetasit që janë në listën zgjedhore, po nuk dihet ku banojnë. Se janë emigrantë apo jo, se janë njerëz që u ka ngelur banesa në letra te ajo qëndër votimi, apo se janë në një qytet tjetër; se janë njerëz që nuk ekzistojnë, kjo nuk dihet. Kjo cënon parimet e sistemit zgjedhor, barazinë e votës së qytetarëve dhe ka shërbyer si shteg për manipulimin e zgjedhjeve, me shtetas që ekzistojnë vetëm në listë por jo në territor”- theksoi Ministri i Brendshëm Tahiri.
