Ministri i Brendshëm, Saimir Tahiri, ka vlerësuar progres-raportin e Komisionit Europian për punën e policisë shqiptare si një “tregues suksesi”, por ka kritikuar drejtësinë se çon dëm punën e bërë nga forcat e rendit.
“Raport progresi për luftën kundër krimit e korrupsionit është tregues real i suksesit të luftës sonë kundër krimit të organizuar, sidomos kundër drogës, por edhe axhendë prioritetesh në punën tonë”, tha pak minuta më parë Tahiri në konferencën për shtyp.
“2014-a ishte viti i parë kur hoqëm Shqipërinë nga lista e zezë e vendeve të origjinës së trafikut të drogës. Aksioni i Lazaratit, më i madhi i policisë më 2014, është shënuar edhe në raport si sukses kundër trafikimit”.
Më poshtë, ministri ka folur për pjesën që i takon sistemit të drejtësisë, duke e kritikuar atë se rikthen në shoqëri të arrestuarit nga policia.
“Progresi konstaton se ndjekja penale e të arrestuarve nuk ka qenë maksimale. Ky është një tregues tjetër për të çuar përpara sa më shpejt reformën në drejtësi, që puna e policisë të mos shkojë dëm, që arrestimet e policisë të mos gjejnë amnesti joligjore në prokurori apo në sistemin gjyqësor, që pandëshkueshmëria të mos jetë ana tjetër e medaljes në punën e policisë së shtetit, që të mos ndodhë më që policia i arreston dhe drejtësia i rikthen mes shoqërisë”.
Duke iu rikthyer punës së policisë në luftën kundër drogës, Tahiri tha se “në dy vjet kemi shkatërruar 1.3 milionë rrënjë kanabis, 46 për qind më shmë se në tetë vjet të qeverisë së mëparshme”.
“Nuk presim që opozita të kërkojë ndjesë, por të mbështesë policinë e shtetit, pasi suksesi i policisë kundër krimit, paligjshmërisë, informalitetit, nuk është suksese ekskluziv i ministrit e mazhjoranxës, por sukses i përbashkët i shoqërisë”. (javanews.al)
