Ministri i Brendshëm i kërkon hapur dhe publikisht Prokurorit të Përgjithshëm të zbardhë ngjarjen e “21 janarit”, ku humbën jetën 4 protestues të opozitës së kohës.
Deklarata nuk ishte vetëm një gjest politik nga salla e konferencave të partisë, por u artikulua në sallën ku ministri dhe kryeprokurori ishin të ftuar në analizën e policisë.
“I nderuar Prokuror i Përgjithshëm ka shumë gjëra që mund të bëjmë më mirë nga trajnimi më i mirë i policisë dhe oficerëve të Policisë Gjyqësore për të çuar përpara çështjet, nga bashkëpunimi me Prokurorinë, nga delegimi i çështjeve për të mos pasur delegim preferencial nga prokurorët kur disa çështje delegohen edhe disa të tjera jo edhe deri te hetimi, siç e thatë dhe ju i çështjeve të rëndësishme, ngjarje kriminale të cilat kanë ngecur. Ka ngjarje që kanë ndodhur tani afër, ka ngjarje që kanë ndodhur pak më larg por duke filluar nga 21 janari dhe vrasja e katër protestuesve në bulevard, te vrasja e deputetit dhe të shumë ngjarjeve të tjera deri te korrupsioni duhet të ketë veprim aktiv të Prokurorisë dhe Policisë për t’i çuar përpara këto hetime përndryshe qytetarët nuk kanë asnjë motiv që të besojnë se këtu ka ndëshkueshmëri”, deklaroi ministri i Brendshëm.
“Tema” shkruan se kryeprokurori Llalla nuk iu përgjigj drejtpërdrejt Tahirit, edhe sepse kishte folur më herët në panel, por gjatë fjalës shprehu kritika për kapacitetet dhe eficencën e Policisë Gjyqësore.
Llalla ka premtuar arrestime të bujshme, por sot ai ia ka hedhur fajin policisë pse nuk ka ndodhur kjo gjë.
Ai kritikoi kupolën drejtuese të policisë për lëvizjet e shpeshta të oficerëve dhe për vonesat në përgjigjet e ekspertimet shencore .
“Prokurorët kanë shqetësimin për lëvizjet e shpeshta të oficerëve të policisë gjyqësore, gjë e cila ul ritmin e hetimeve. Nga ana tjetër, gjatë vitit 2015 u konstatua një problematikë e spikatur lidhur me ekspertimet në Policinë Shkencore. Burimet e reduktuara në kapacitete njerëzore dhe në mjete teknologjike kanë ndikuar në uljen e ritmit të hetimeve”.
Dosja e “21 janarit” pret prej vitesh një vendimmarrje nga Gjykata e Lartë.
Sipas “Tema”-s Ministria e Brendshme ka depozituar edhe disa padi për ish-ministrin Lulzim Basha për shpërdorim detyre dhe ish-drejtues të lartë të Policisë, për mos ekzekutimin e urdhër-arresteve të prokurorisë.
