Ministri i Brendshëm Saimir Tahiri është paraqitur sot në Prokurorinë e Përgjithshme ku do të merret në pyetje në lidhje me padinë që Këshilli i Lartë i Drejtësisë ka bërë ndaj tij sa i takon akuzave që ai bëri ndaj gjyqtarit Arian Aliaj.
Fill pas përfundimit nga seanca e marrjes në pyetje, ministri Tahiri ka dhënë një deklaratë për mediat, ndërsa nga ambientet e jashtme të Prokurorisë së Përgjithshme ka sulmuar sërish KLD-në, duke e cilësuar atë si Këshillin e Lartë të Padrejtësisë. Ai theksoi se askush nuk mund ta ndalojë atë që të shpreh opinionin e tij për çdo rast të prokurorëve apo gjyqtarëve të korruptuar, ndërsa theksoi se KLD është korporata më e korruptuar.
“Iu përgjigja thirrjes së prokurorisë për të dhënë informacione mbi deklaratat për gjyqtarin Aliaj pas një kallëzimi të KLD. Sqarova në prokuro të gjitha deklarimet pikë për prejse që kam bërë. Besoj se ka nevojën për të parë në detaje shumë të imta punën e çdo gjyqtari pavarësisht vullnetin. S’më ndalon njeri të jap opinionin tim për vendime absurde të gjyqtarëve që janë atë detyrë janë për shkak të qokave që kanë bërë. Sot 90 për qind e shqiptarëve besojnë se ka korrupsion. Unë e besoj akoma më shumë këtë se duke parë sesi gjyqtarë japin vendime në kufijtë kriminale, duke u lënë rrugë ngjarjeve të rënda me pasurinë dhe jetën e qytetarëve. ndaj cilado padi e KLD-së të Padrejtësie, e Këshillit të lartë, ose më saktë korporatës që drejton sot Këshillin më të lartë të Korrupsionit s’më ndalon dot mua të flas dhe jap opinion.”, tha Tahiri.
KALLEZIMI
Regjistrimi i kallëzimit penal të Këshillit të Lartë të Drejtësisë ndaj ministrit Tahiri u bë më 20 qershor. Disa ditë më parë ministri i Brendshëm Tahiri në një konferencë për shtyp akuzoi Këshillin e Lartë të Drejtësisë se mban në gjirin e saj gjyqtarë të korruptuar, që kanë dhënë gjykime të padrejta. Akuzat e tij ai i bazoi në rastin e gjyqtarit Arian Aliaj dhe Osman Aliu.
Tahiri tha se 9 anëtarët e KLD-së janë 9 anëtarë të Këshillit të Lartë të Padrejtësisë, pasurisë e që sipas tij përbëjnë korporatën e së keqes. Pasura e tyre sipas Tahirit, i kalon 5 miliardë lekë.
BW/d.i.
