Ministri i Punëve të Brendshme Saimir Tahiri ka marrë pjesë në Forumin e Ministrave të Brendshëm dhe të Drejtësisë, që po mbahet në Slloveni.
Çështjet që u diskutuan ishin menaxhimi i flukseve migratore, gjetja e rrugëve sa më efikase për bashkëpunim në këtë aspekt.
Në ministerial morën pjesë, vendet anëtare të Ballkanit Perëndimor. Në Forum u diskutuan bashkëpunimi policor me fokus luftën kundër terrorizmit, si dhe goditja e tregut ilegal të armëve të zjarrit.
Në takimin ku morën pjesë edhe Komisioneri Europian për Zgjerimin Dimitri Avramopoulos, përfaqësues të FRONTEX, UNDP, ministri Saimir Tahiri u shpreh se Policia shqiptare bën arrestime të përmuajshme kundër trafikantëve dhe po shkëmbehet informacion me agjensitë partnere dhe EUROPOL-in. Ministri shtoi se po zgjerohen kapacitetet për të shkëmbyer informacion, si dhe po investohet për ngritjen e infrastrukturës si dhe burimet njerëzore.
Tahiri: Ne po përpiqemi të përforcojmë kontrollin tonë kufitar përmes kapaciteteve njerëzore dhe infrastrukturore. Dhe për këtë do ta vlerësoja shumë ndihmesën e të gjithëve ju, për të na ndihmuar në këtë fazë kalimtare.
E sigurt është që ne nuk jemi në fazë emergjence. Por është e sigurt gjithashtu se Shqipëria nuk është jashtë rrezikut. Duket si i njëjti skenar për të gjitha vendet e rajonit.
Kështu, ne kemi kërkuar vazhdimisht ndihmë nga Greqia dhe Italia, dhe këtu do të doja të falënderoja Dimitris Avramopoulos për ndihmën e tij.
Gjithashtu kemi kërkuar vazhdimisht ndihmën e FRONTEX për këtë qëllim. Duket se nuk jemi vonë për të bashkëpunuar me njëri-tjetrin, madje kemi ende për të bërë së bashku.
Në Shqipëri ka arrestime të rekrutuesve dhe trafikantëve. Ne po shkëmbejmë informacione me agjensitë partnere dhe EUROPOL-in. Por edhe po zgjerojmë kapacitetet tona për të shkëmbyer informacionin, për të ndihmuar në ngritjen e infrastrukturës dhe të burimeve njerëzore.
Mund të bëjmë dhe më shumë. Dhe në këtë perspektivë, çdo lloj asistence nga Dimitris, FRONTEX, EUROPOL dhe kushdo tjetër, është më shumë se e mirëpritur.
Ne i kemi mësuar mësimet tona. Nuk kemi më luksin për të qenë vonë. Pra le të bëjmë atë që duhet të bëjmë, përpara se të jemi përpara emergjencës.
/a.m.
