Ministri i Brendshëm, Saimir Tahiri para studentëve të Akademisë së Policisë deklaroi se provimi i përditshëm në luftën kundër informalitetit, paligjshmërisë dhe kriminalitetit është testi që jeni të dënuar ta kaloni, sepse testi i qytetarëve është shumë herë më i vështirë se çdo test në bankat e shkollës.
“Dallimi nga jeta normale e një të riu dhe një të reje nga jeta e përditshme, qoftë kjo në bankat e fakultetit, qoftë kjo në punë, është …. me atë që keni bërë ju në Akademinë e policisë për t’u arsimuar dhe është akoma më larg, me jetën e re që fillon për ju që nesër e tutje.
Testi publik është shumë herë më realist dhe më i vështirë sesa çdo test tjetër në akademi apo në periudhën që ju është dashur për të bërë punën tuaj. Është testi që jeni të detyruar ta kaloni, ju dhe kolegët tuaj në Policinë e Shtetit”tha ai.
Më pas ministri është ndalur te gjobat ndaj makinave për shpejtësinë jashtë normalve të lejuara.
“Besoj jeni bërë dëshmitarë këto ditë për qytetarë kurajozë, që mbi të gjitha na kanë ndihmuar ne, në një mënyrë apo një tjetër, me fotografi apo me video për gjoba të policisë rrugore, për shpejtësi, që vendosen, pa pasur mjetet teknologjike përkatëse, radarët.
Dhe me plot të drejtë janë ngritur vërejtje dhe kritika sesi mund të masë punonjësi i policisë shpejtësinë me sy dhe mbi këtë bazë të vendosi gjobë.
Për këtë arsye bashkë me Drejtorin e Policisë është vendosur që asnjë punonjës policie, të policisë rrugore, të mos vendosë gjoba për shpejtësinë pa pasur mjetet teknologjike përkatëse. Kjo do të thotë luftë kundër arbitraritetit”deklaroi Tahiri.
