Nga Ardit Rada/
Të pakta ishin kanalet mediatike që e raportuan një debat në distancë, por brenda të njëjtës sallë, midis ministrit të Brendshëm dhe Kryeprokurorit të Republikës. Në fakt, përplasje të tilla me ndjeshmëri shoqërore, ia ulin dozat e argëtimit cirkut politik të përditshëm që personat publikë ofrojnë.
Në tryezën e së mërkurës, Adriatik Llalla në vend sesa t’i shtonte diçka atyre që deklaroi me telefon nga Kroacia, zgjodhi të merrej me lëvizjet në kupolën e Policisë Gjyqësore. Këto pretendime dhe fjalë të tjera të tij ishin as më pak dhe as më shumë një përpjekje për të fajësuar të dytë apo të tretë mbi nivelin e korrupsionit, por edhe si manovër për të zhvendosur debatin politik se ç’mendon vetë Kryeprokurori për mandatin e tij (?)
Kësaj pyetje prokurori i parë i vendit nuk mund t’i përgjigjet për aq kohë sa do të dukej shumë egoiste dhe për aq kohë sa parti kryesore politike e bëjnë zellshëm avokatin, por një qëndrim i tillë i mundshëm dhe i prerë duke iu dorëzuar hapur Reformës nuk do t’i bënte keq fazës parapërgatitore që dita-ditës po ushtron trysni dhe po ngjall kureshtje se kush dhe si do të bjerë çdo tjegull e çatisë. Aq më tepër që diplomati më i lartë në vend po e thotë shqip dhe dita-ditës se reformën e ka ‘pikë të dobët’ Uashingtoni.
Në fakt, përballë pretendimeve të ministrit Tahiri se Prokuroria duhet të zbardhë vrasje që duken bindshëm të karakterit politik, Prokurori ka detyrime të tjera para publikut që nisin që prej kohës kur ai drejtonte ILDKP dhe kur mbipasurimi tej normave i politikanëve kalohej thjeshtë duke paguar një gjobë qesharake në krahasim më çfarë dispononin.
Unë nuk e di sesi dhe sa do të zgjasin hetimet e 21 Janarit që lindën të vdekura qysh prej fillimit, por mos vallë çështjes ‘Fullani’ i lëvizën policët gjyqësorë dhe ndaj Prokuroria nuk bëri rekurs në Gjykatën e Lartë? Rekursi, për ata që s’e dinë, është procedurë juridike që bëhet edhe pa policë. Por siç duket, ai burri të ‘Rruga e Elbasanit’ duhet të mësojë edhe dialektet e shqipes…
