Ministri i Brendshëm, Saimir Tahiri, foli sot për herë të parë pas kallëzimit penal që Këshilli i Lartë i Drejtësisë dorëzoi në prokurori për të.
Në një dalje publike, Tahiri tha se e denoncoi gjyqtarin Arjan Aliaj pasi ai ka liruar të dënuar për vrasje dhe përdhunime.
“Këshilli i Lartë i Padrejtësisë dhe Pasurisë, i Nishanit dhe Gjin Gjonit, nuk do të ma mbyllin gojën. KLD, sot ka fytyrën e Nishanit dhe Gjin Gjonit… i falenderoj me shumë mirënjohje që nuk kanë guximin t’i flasin publikut në fytyrë… Këta miliarderë në KLD, t’i mbledhësh bashkë kanë kryer një akt të paprecedentë, duke më kallëzuar penalisht pse kam kallëzuar publikisht një gjyqtar që ka pavlefshmëri” – tha Tahiri.
Akuzat Tahiri-KLD erdhën pas deklaratave të ministrit të Brendshëm për gjyqtarin Aliaj që pezulloi dy oficerët e lartë të Policisë dhe pezulloi drejtorin e përgjithshëm, Haki Çako.
