Ministri i Brendshëm, Saimir Tahiri, deklaron se policia nuk duhet të tundet nga presioni që i bëhet nga politika dhe drejtësia.
“I bëj thirrje çdo polici të bëjë punën me kurajo, pa asnjë presion nga ata që janë trimëruar sot, bashkë me bashkëpunëtorët e tyre në prokurori e gjykata”, tha Tahiri.
“Çdo polic ka motivin të jetë krenar për punën që kemi bërë deri sot për ta bërë Shqipërinë më të sigurt e më të drejtë”.
Tahiri foli edhe për deklaratën e Këshillit të Lartë të Drejtësisë, duke thënë se KLD e tregoi më në fund fytyrën.
“Dua të përshëndes deklaratën e KLD, sipas meje një ndër deklaratat më të sinqerta të KLD në mbrojtje të gjyqtarit Aliaj. Sepse nuk besoj do kishte pasur mundësi që KLD të demaskohej në mënyrë kaq ekzemplare në mbrojtje të një gjyqtari që ka liruar vrasës, përdhunues. Përshëndes deklaratën e KLD për fytyrën e vërtetë që tregoi, duke mbrojtur një gjyqtar deri dje të shkarkuar për këtë dhe të emëruar prapë”, tha Tahiri.
Tahiri i kërkoi kryetarit të gjykatës së Tiranës, të cilin e akuzoi për lidhje direkt me Sali Berishën dhe Lulzim Bashën, të shpjegojë se si u caktua jashtë radhe e jashtë ligji gjyqtari Aliaj për çështjen e drejtorit të policisë, Haki Çako.
“Dua të bëj me dije fakte skandaloze që dëshmojnë se si funksionon sistemi i drejtësisë në këtë vend, se si preferencat politike kthehen në vendime dhe se si tërhiqen gjyqtarët me pinca, ku ka nevojë që vendimi politik të shkojë deri në fund, për të ndalur rrugën tonë për të çuar përpara reformën e drejtësisë. Gjyqtari Arjan Alia që dha vendimin ndaj drejtorit Haki Cako nuk ishte i gatshëm, gjyqtari i gatshëm duhet të ishte Adriatik Bocaj. Shorti në fakt për çudi është mënjanuar dhe gjyqtari që ka marrë përsipër këtë çështje ishte gjyqtari Arjan Aliaj. Unë i drejtoj një pyetje KLDD, unionit të gjyqtarëve, sindikatave të gjyqtarëve, presidentit e kujtdo që mund të japë një përgjigje për këto pyetje, për cilën arsye jashtë ligjit, jashtë shortit, u përzgjodh gjyqtari Aliaj për të dhënë vendimin për drejtorin Haki Cako? Për cilën arsye nuk u respektua ligji?”, tha ministri.
D.I.