Tahiri ashpërson tonet: Të nxjerrim në pension ata si Saliu, qytetarët të mundin ‘partiçkat’

Ndalesa e rradhës e kreut të PS-së së Tiranës ishte zona e Bërzhitës. Saimir Tahiri, i shoqëruar nga kandidatët Xhemal Qefalia dhe Azbi Arapi, ftoi qytetarët t’i kthejnë ditët e mbetura deri në 25 Qershor, në angazhim për të bindur këdo të votojë Partinë Socialiste. Ai u shpjegoi banorëve arsyet.

“Në 2013 ne kishim një prioritet shumë të madh, të mundnim Sali Berishën. Në 2013-n falë jush ne ia dolëm ta nxirrnim në pension Sali Berishën. Tani kemi një prioritet edhe më të madh, të nxjerrim në pension dhe të mundim të gjithë ata që si Saliu dhe rraca e tij i rrinë në qafë këtij populli prej 25 vjetësh. Dhe kësaj do ia dalim bashkë me ju”, tha Tahiri.

Kreu i PS-së së kryeqytetit ishte i drejtpërdrejtë kur u tregoi banorëve të Bërzhitës përse shumë punë nuk janë kryer në vend. Tahiri tha se qytetarët duan më shumë punë, por janë ‘partiçkat’ që duan punë për vetë. E sipas tij, nëse qytetërat duan më shumë legalizime, kryetarët e ‘partiçkave’ duan të legalizojnë postin e tyre.

Ndër reformat më të rëndësishme të realizuara, ish-ministri veçoi atë administrative.

“Ne kemi bërë disa gjëra. Unë po iu përmend vetëm një, reformën administrative. Po mendoni pak vetëm vlerën e pasurisë tuaj, sa është shtuar. Mendoni pak potencialin për të bërë më shumë. Sot investohet vetëm në qendër të Tiranës nga bashkia, por nesër do të investohet edhe në këto zona”, shtoi Tahiri.

Kryetari i PS-së më tej kishte një ftesë për këdo, të ndihmojë fitoren e socialistëve, për një mandat me mbi 71 mandate në Kuvend.

“Jam shumë i bindur që një i ri apo një e re këtu ka në mend 10 shoqe, 10 shokë, të cilët mund t’i marri në telefon, mund t’i takojë këto 17 ditë dhe t’i bindë që të votojnë Partinë Socialiste. Jam shumë i bindur që çdo burrë dhe çdo grua këtu ka në mend 10 komshi, të cilëve mund t’iu trokasë te dera dhe t’iu marrë votën. Jam shumë i bindur, që secili prej jush ka në mend 10 të afërm, 10 miq. Secili prej jush ka nga një minifuqi prej 10 vetash apo 10 familjesh, që atë ditë duhet t’i marrin të gjithë prej dore të shkojnë bashkë te kutia e votimit, sepse ajo ditë do jetë dita e fitores së qytetarëve përballë ‘partiçkave’ që i kanë ndenjur në kurriz këtij populli.

Sot nuk është më koha të rrish para televizorit dhe të thuash që unë jam me Partinë Socialiste. Faleminderit dhe aq. Por nuk mjafton. Sot është koha të shkosh të trokasësh te komshiu. Sot është koha të shkosh të bindësh shokun. Sot është koha të shkosh të flasësh me të afërmin tënd. Sot është koha ti të ngrihesh dhe të fitosh vetë. Sot është koha të bëjmë një luftë të përbashkët miqtë e mi, sepse sot është koha ta mbyllim atë 25-vjeçarin, që na rri mbi kokë dhe që na ka dhembur jo pak, apo jo?”, u shpreh Tahiri.