Ministri i Brendshëm Saimir Tahiri, njëherësh edhe kryetari i Partisë Socialiste të Tiranës, ka zhvilluar një takim me disa të rinj të kryeqytetit që do të votojnë këtë 18 Qershor në zgjedhjet parlamentare.
Në fjalën e tij Tahiri tha se në çadrën e ngritur në bulevard janë mbledhur ata që mbrojnë gjyqtarët e korruptuar.
Sipas Tahirit, Partia Socialiste ka zgjedhur të qëndrojë gjithnjë në krahë të popullit dhe jo të gjyqtarëve të korruptuar.
“Sot në Shqipëri ndodh të jesh polic dhe të marrësh 5 mijë lekë shkon në burg, ndërkohë të jesh gjyqtar të vjedhësh para, toka, apartamente qëndron në detyrë. Të mbash armë shkon në burg ndërsa, të mbash biznes armatimi dhe të vrasësh 26 njerëz nuk të gjen gjë. Të vjedhësh nga qytetari në autobus shkon në burg, por të vjedhësh miliona euro nga një rrugë nuk dënohesh, strehohesh te çadra. Populli vuan përballë dyerve të gjykatave ndërkohë gjyqtarët pasurohen nga hallet e popullit. Përballë gjyqtarëve të korruptuar ne zgjedhim popullin jo gjyqtarin e korruptuar. Ata te çadra të zgjedhin gjyqtarin e korruptuar’’, tha Tahiri./express/a.k
