Lideri i Partisë Socialdemokrate të Serbisë, Boris Tadiç, ish-president i këtij vendi, ka vlerësuar se pohimet e zyrtarëve serbë dhe malazezë për mafinë malazeze dhe për pretendimet për përpjekje për grusht-shtet në Podgoricë, tregojnë se marrëdhëniet e dy vendeve janë katastrofale.
Më tutje, gjatë një konference të sotme për gazetarë në Beograd ai ka theksuar se këto pohime mund të jenë “gënjeshtër e madhe”.
Tadiç ka vlerësuar se nga rezultatet e zgjedhjeve në Mal të Zi më domethënëse është informata se një grup, që kishte ardhur nga Serbia, sipas deklaratave të zyrtarëve të Malit të Zi, ishte përpjekur të kryejë grushtshtet, raporton agjencia Beta nga Beogradi.
Ish-presidenti i Serbisë, Boris Tadiç, ka përkujtuar se gjatë 24 orëve të kaluara nga Serbia janë dëgjuar konstatime se mafia malazeze po vranë nëpër Beograd.
“Kjo është dëshmi e raporteve katastrofale ndërmjet dy vendeve ose kjo është gënjeshtër e madhe”, tha Tadiç dhe ka shtuar se për të gjitha këto duhet të zhvillohen hetime.
Tadiç tha se, në Serbi, po ashtu, ishte “montuar puç shtetëror” dhe se duhet të zhvillohen hetime se a është i njëjti “dorëshkrim”, përgatiti Rel. (b.an)
