Deputetja e Partisë Demokratike, Jorida Tabaku deklaroi sot se në vitin e fundit të një mandati ku ka rënie ekonomike, qeveria në mungesë ideje e vizioni , ka vendosur të baltosë edhe kundërshtarin politik.
Deputejta e PD-së Tabaku në një deklaratë për mediat tha se ,”të bësh propagandë është më e lehtë se të punosh. Duhet gënjyer sa më shumë që shqiptarët të harrojnë premtimin e 300 mijë vendeve të reja të punës. Duhet gënjyer që të harrohet premtimi i 160 mln USD investimeve në kanalet vaditëse madje duhet ndërtuar një gënjeshtër sa më e madhe që fermerët të harrojnë përmbytjet e dy viteve rresht ndërsa qeveria pasuronte veten dhe rriste luksin për zyrat e saj”, tha ajo.
“Të dhënat e vetë qeverisë tregojnë se bujqësia pati një peshë të konsiderueshme në rënien e PBB-se (në masën 1.94%). Duke ulur punësimin në sektorin bujqësor, vetëm për vitin e shkuar me 3.5%, ndërsa subvencionet bujqësore shkojnë në xhepat e grosistëve që në shumicën dërrmuese të rasteve janë miqtë pranë qeverisë. Tabaku theksoi se “Nuk ka asnjë arsye pse të sulmohet programi që premton uljen e taksave, rritjen e pagës minimale dhe nxitjen e rritjes së konsumit “. (javanews.al / a.r)
