Syriza ndahet në tresh
Nuk do të jetë më vetëm linja zyrtare e Aleksis Cipras, brenda partisë Syriza, e cila qeveris Greqinë sot. Para pak ditësh ka dhënë dorëheqjen edhe sekretari i partisë Tasos Koronakis, i cili doli në opozitë me linjën zyrtare të Ciprasit. Koronakis konsiderohej njëri ndër njerëzit më besnikë të Ciprasit, por në letrën e dorëheqjes ka kritikuar vendimin për të shkuar në zgjedhje të parakohshme, pa e diskutuar këtë gjë më parë në forumet e partisë.
Koronakis shprehet se vendimet e fundit të ish-kryeministrit e kanë dobësuar Syrizan, duke pranuar njëkohësisht se strategjia politike e kësaj partie ka dështuar. Koronakis ka kritikuar ashpër gjithashtu edhe Panajotis Lafazanis, përfaqësuesin e fraksionit kryesor brenda Syrizas, si dhe përfaqësuesit e tjerë të “Platformës së Majtë”, të cilët braktisën partinë, për të formuar “Bashkimin Popullor”. Koronakis thotë se ata dukeshin sikur mezi po e prisnin këtë moment.
Sipas disa analistëve, zemërimi i Koronakis mund ta ndajë Syrizan në tre pjesë, pas çarjes së para pak javëve, duke e futur kështu forcën politike më të madhe në Greqi, në një rrugë pa krye.
